एजेन्सी । दक्षिण लेबनानमा संयुक्त राष्ट्र संघका शान्ति सैनिकमाथि आक्रमण हुँदा २ जनाको ज्यान गएको छ । अन्य १ जना घाइते भएका छन् ।
लेबनानका लागि संयुक्त राष्ट्र संघ अन्तरिम शान्ति सेना (युनिफिल)का अनुसार दक्षिणी लेबनानको बानी हय्यान गाउँ नजिकै भएको विष्फोटबाट शान्ति सैनिक सवार गाडी क्षतिग्रस्त भएको छ ।
सोमबार भएको यो पछिल्लो घटनामा परी २ शान्ति सैनिकको ज्यान गएको र १ जना घाइते भएको युनिफिलले सामाजिक सन्जालमार्फत् जानकारी दिएको छ ।
यसअघि गत आइतबार पनि दक्षिणी लेबनानकै अल–कुसायर नजिकै युनिफिलको पोष्टमा आक्रमण हुँदा १ शान्ति सैनिकको ज्यान गएको थियो ।
साथै लेबनानकै माइस–अल–जबाल भन्ने ठाउँमा नेपाली शान्ति सैनिक रहेको कमाण्ड पोष्टमा आक्रमण भएको थियो । सो आक्रमणमा शान्ति सैनिकका व्यक्तिगत केही सामानमा क्षति पुगे पनि मानवीय क्षति भएको थिएन ।
सोमबारको आक्रमणमा परी ज्यान गुमाउने २ जनामध्ये १ जना इन्डोनेसियाली सैनिक भएको पुष्टि भएको छ ।