गोरखा । डिभिजन वन कार्यालय गोरखाले वन डढेलो सम्बन्धी सन्देशमूलक स्टिकर बस बसमा टाँस्ने अभियान चलाएको छ ।
व्यवस्थापन कार्ययोजना २०८२ को कार्यान्वयन अन्तर्गत कार्यालयले जिल्ला भित्र र बाहिर चल्ने बसहरुमा स्टिकर टाँस्ने अभिायन चलाएको डिभिजन प्रमुख मदनमोहन शाण्डिल्यले जानकारी दिए ।
उनका अनुसार जिल्लामा जनचेतना अभिवृद्धि गर्ने उद्देश्यले सार्वजनिक यातायातका साधनहरूमा वन डढेलो सम्बन्धी सन्देशमूलक स्टिकर टाँस्न थालिएको हो ।
कार्यालले औपचारिक रूपमा हिजो देखी सार्वजनिक सवारीहरुमा स्टिकर टाँस्ने अभियानको शुभारम्भ गरेको प्रमुख शाण्डिल्यले बताए ।
कार्यक्रम समुदाय–प्रहरी साझेदारी अवधारणासँग समेत आबद्ध गरिएको थियो । कार्यक्रम अन्तर्गत पोखरा, काठमाडौं, चितवन लगायत लामो दूरी तथा जिल्लाभित्र सञ्चालन हुने छोटो दूरीका सार्वजनिक यातायातका ३० भन्दा बढी साधनहरूमा सचेतनामूलक स्टिकर टाँसिएको डिभिजन वन कार्यालयले जनाएको छ ।
कम लागतमै व्यापक जनसमुदायसम्म सन्देश पुर्याउने उद्देश्यले यो अवधारणा अगाडि सारिएको पनि प्रमुख शाण्डिल्यले जानकारी दिए ।
यसरी सार्वजनिक यातायातमार्फत सन्देश प्रवाह हुँदा दुर्गम तथा शहरी दुवै क्षेत्रका नागरिकसम्म प्रभावकारी रूपमा जानकारी पुग्ने उनको अपेक्षा रहेका छ । यस कार्यक्रमलाई आगामी दिनहरूमा थप विस्तार गर्दै निजी तथा सामुदायिक विद्यालयहरूसँग समन्वय गरी विद्यालय बसहरूमा समेत यस्ता स्टिकर टाँस्ने योजना रहेको पनि उनले बताए ।
स्टिकर टाँस्ने कार्यक्रममा जिल्ला ट्राफिक प्रहरी कार्यालय गोरखाका कार्यालय प्रमुख, बस व्यवसायीहरू तथा डिभिजन वन कार्यालयका निमित्त डिभिजनल वन अधिकृत सहित कर्मचारीहरूको उपस्थिति रहेको ।
तस्बिर : डिभिजन वन कार्याल गाेरखाद्धारा साैजन्य