गाेरखा । नेपाली कांग्रेसका सभापति गगन थापाले जेनजी आन्दाेलनका क्रममा भदौ २४ गते नेताका घरमा भेटिएको र जलेको पैसाको अनुसन्धान गरी आवश्यक कानुनी कारबाही गरिनुपर्ने बताएका छन् ।
मंगलबार हिजाे केन्द्रीय कार्यालय सानेपामा बसेको केन्द्रीय कार्यसमिति बैठकमा बोल्दै सभापति थापाले विभिन्न काण्डहरूबारे छानबिन गरिनुपर्ने बताएका हुन् ।
‘काण्डहरू अब सार्वजनिक खपतको विषय हुनु हुँदैन। आरोप र प्रत्यारोपको विषय पनि हुनु हुँदैन। दूधको दूध पानीको पानी हुनुपर्छ, जसले गरेको छ त्यसले भारी बोक्नुपर्छ,’ सभापति थापाले भने, ‘जति पनि काण्डहरू छन् । गिरीबन्धु जग्गा प्रकरण, ललितानिवास जग्गा प्रकरण, वाइडवडी जहाज वा भदौ २४ गते नेताको घरमा भेटिएको र जलेको पैसा होला। यसबारे कानुनसम्मत अनुसन्धान हुनुपर्छ र गलत काम भएका छन् भने दण्ड सजायको भागीदार हुनुपर्छ ।’
भदौ २४ गते पूर्वप्रधानमन्त्री शेरबहादुर देउवाको घरमा पनि आगजनी र देउवा दम्पतिमाथि कुटपिट भएको थियो ।
त्यसक्रममा बूढानीलकण्ठस्थित घरमा पैसा भेटिएको भन्ने समाचारहरू आएका थिए। देउवाले भने गत असोज २८ गते केन्द्रीय समिति बैठकमा बोल्दै उक्त भिडिओ एआईमार्फत् बनाइएको दाबी गरेका थिए ।
