गाेरखा । अहिले बजारमा नेपाली कांग्रेसका सभापति गगन थापाले राजिनामा दिएकाे बिषयले चर्चा पाएकाे छ । भाेली हुने केन्द्रीय समिति बैठक अगाडी सभापति थापाको राजीनामाकाे हल्लाले राजनैतिक बृत्तमा समेत ठूलाे चर्चा पाएकाे छ ।
यता प्रवक्ता देवराज चालिसेले सभापति गगन थापाको राजीनामा औपचारिक रूपमा आइनसकेको बताएका छन् । सभापति थापाले राजीनामा दिएको चर्चा बाहिर आए पनि औपचारिक रूपमा राजीनामा दिएको कुनै जानकारी नरहेको उनले बताए ।
विधानत सभापतिले राजीनामा उपसभापतिलाई दिनुपर्ने र उपसभापतिले केन्द्रीय कार्यसमिति बैठकमा पेस गर्नुपर्ने व्यवस्था छ ।
प्रवक्ता चालिसेले सभापति थापाले राजीनामा दिएको भए भाेलीबाट सुरु हुने केन्द्रीय समिति बैठकमा पेस र बल्ल जानकारी हुने समेत बताए । कांग्रेसले प्रतिनिधि सभा निर्वाचनको समीक्षा गर्न शुक्रबार केन्द्रीय कार्यसमितिको बैठक बोलाएको छ ।
निर्वाचनमा अप्रत्याशित पराजय व्यहोरेपछि सभापति थापाले नैतिक जिम्मेवारी लिँदै नैतिकताको आधारमा पदबाट राजीनामा दिनुपर्ने एकथरीले आवाज उठाइरहेका बेला विभिन्न सञ्चार माध्यमहरुमा उनकाे राजिनामाकाे कुरा आएकाे छ ।
विशेषगरी कांग्रेस विशेष महाधिवेशनमा सहभागी नभएकाहरुले उनकाे राजिनामा मागेका कुरा सामाजिक सञ्जालमा छरप्रष्ट देख्न सकिन्छ । विशेष महाधिवेशन पक्षीय नेताहरूले भने राजीनामा दिएर समस्याको समाधान नहुने बताइरहेका छन् ।
यता सभापति थापाले निर्वाचनमा अप्रत्याशित पराजय व्यहोरे लगत्तै उपसभापति विश्वप्रकाश शर्मासँगको भेटमा राजीनामा दिएकाे हल्लाले बजार तातेकाे छ ।
२७ देखि ३० पुससम्म भृकुटीमण्डपमा भएको कांग्रेस विशेष महाधिवेशनले थापाको नेतृत्वमा नयाँ केन्द्रीय कार्यसमिति चयन गरेको थियो । त्यसको वैधानिकतालाई लिएर निवर्तमान सभापति शेरबहादुर देउवा र देउवाद्वारा कार्यवाहक तोकिएका पूर्णबहादुर खड्काले दायर गरेको रिट सर्वोच्च अदालतमा अहिले विचाराधीन छ ।