गोरखा । गोरखामा फागुन २१ गते भएको प्रतिनिधिसभा निर्वाचनमा प्रत्यक्षतर्फका उम्मेदवारहरुले खर्चको विवरण सार्वजनिक गर्न थालेका छन् ।
निर्वाचन आयोगले तोकेको खर्चको सीमा भित्र हरेर गोरखाका ३ जना उम्मेदवारहरुले खर्च विवरण सार्वजनिक गरेका हुन् ।
विवरण सार्वजनिक गर्नेहरुमा नेपाली काँग्रेसका २ र नेपाल कम्युनिष्ट पार्टीका १ जना गरहेका छन् ।
नेपाली काँग्रेस क्षेत्र नम्बर १ का उम्मेदवार प्रेमकुमार खत्रीले २९ लाख ८२ हजार ५३० क्षेत्र नम्बर २ का उम्मेदवार प्रकाशचन्द्र दवाडीले २२ लाख ५५ हजार ७२५ र नेपाल कम्युनिष्ट पार्टीका क्षेत्र नम्बर १ का उम्मेदवार हरीराज अधिकारीले २३ लाख २१ हजार रुपैयाँ खर्च भएको विवरण निर्वाचन आयोगमा पेश गरेका हुन् ।
आयोगले निर्वाचन क्षेत्रहेरी कम्तिमा २९ लाखदेखि बढीमा ३३ लाखसम्म खर्च गर्न पाउने सीमा तोकिएको थियो । सोही सिमा भित्र रहेको गोरखाका उम्मेदवारहरुले खर्च विवरण आयोगमा पेश गरेका हुन् ।
निर्वाचन खर्चमा मतदाता नामावली खरिद, सवारीसाधन, प्रचारप्रसार सामग्री, ढुवानी, गोष्ठी अन्तरक्रिया, अन्य प्रचारप्रसार (छापा एवं विद्युतीय माध्यम, सामाजिक सञ्जालसमेत), कार्यालय सञ्चालन र प्रतिनिधि परिचालनलगायतका विषय क्षेत्रमा खर्च गर्न पाउनेछन् ।
काँग्रेसका खत्रीले प्रचारप्रसार सामाग्रीमा ५ लाख १४ हजार, मिडियाँ तर्फ २ लाख ६० हजार, सभा तथा मतदाता भेटघाटमा ५ लाख, सवारी साधान भाडा तथा ईन्धन तर्फ १० लाख, निर्वाचन सम्पर्क कार्यालय सञ्चालन तर्फ ४ लाख ९५ हजार, कार्यकता ब्यवस्थापन तथा प्रचारप्रसार सामाग्री ढुवानीमा २ लाख ९ हजार ५०० र विविध खर्चमा ३ हजार ४०५ रुपैयाँ गरी कुल २९ लाख ८२ हजार ५३० रुपैयाँ खर्च गरेका छन् ।
काँग्रस क्षेत्र नम्बर २ का उम्मेदवार दवाडीले मनोनयन दर्ता १० हजार, सचिवालय खर्च ३ लाख ८० हजार, मिडिया खर्च २ लाख २५ हजार ८५, सवारी साधन तथा ईन्धनमा ८ लाख ८३ हजार १० रुपैयाँ, घरदैलो तथा खाजा खाजा खर्च तर्फ १ लाख ५६ हजार ६० रुपैयाँ, प्रचारप्रसार सामाग्रीमा २ लाख ६७ हजार ५४५ रुपैयाँ, भेला तथा गोष्ठीमा ७५ हजार ६९० रुपैयाँ, कोणसभा र साउण्ड सिष्टममा २ लाख ५० हजार ७२६ तथा विविध खर्चमा ७ हजार ५९० रुपैयाँ खर्च गरेका छन् ।
यता नेपाल कम्युनिष्ट पार्टीका क्षेत्र नम्बर १ का उम्मेदवार अधिकारीले सवारी साधन भाडामा ३ लाख ८० हजार, प्रचारप्रसार सामाग्रीमा ५ लाख २० हजार, गोष्ठी तथा अन्तरक्रियामा १ लाख ५० हजार, विज्ञापन तर्फ ८० हजार र प्रतिनिधि परिचालनमा ९ लाख ५ हजार तथा कार्यालय सञ्चालन तर्फ २ लाख ८६ हजार रुपैयाँ खर्च भएको विवरण आयोगमा पेश गरेका छन् ।
आयोगले प्रतिनिधिसभा सदस्य चुनावमा सहभागी राजनीतिक दल र उम्मेदवारलाई चुनावी प्रचारप्रसारमा भएको आम्दानी तथा खर्चको विवरण ३५ दिनभित्र सार्वजनिक गर्न निर्देशन दिइसकेको छ ।
तोकिएको समयभित्र खर्चको विवरण नबुझाउने, सार्वजनिक नगर्ने वा सार्वजनिक गरेको प्रमाणसहित जानकारी नदिने राजनीतिक दल तथा उम्मेदवारलाई निर्वाचन (कसूर तथा सजाय) ऐन बमोजिम कारबाही हुने भएकाले उनीहरूले त्यस्तो विवरण बुझाउन थालेका छन् ।
यसअघि कतिपयले खर्च विवरण सार्वजनिकसमेत गरिसकेका छन् ।
गोरखा क्षेत्र नम्बर १ मा १२ जना र क्षेत्र नम्बर २ मा १३ जना उम्मेदवारले निर्वाचनमा सहभागिता जनाएको थियो । अन्यको विवरण भने सार्वजनिक हुन सकेको छैन ।
