एजेन्सी । कुख्यात अमेरिकी यौन अपराधी जेफ्री एप्स्टिनको सम्पत्ति व्यवस्थापन पक्षले दर्जनौँ पीडितहरूको कानुनी दाबी टुङ्ग्याउन ३ करोड ५० लाख अमेरिकी डलरसम्म भुक्तानी गर्ने सहमति जनाएको छ ।
बिहीबार अदालतमा दायर गरिएको एक प्रस्ताव अनुसार सन् १९९५ देखि २०१९ सम्म एप्स्टिनबाट यौन दुर्व्यवहार, शोषण वा तस्करीको सिकार भएका व्यक्तिहरूले यो मुआब्जा पाउनेछन् ।
प्रस्तावित फैसलामा मुआब्जाको रकम पीडितहरूको सङ्ख्यामा आधारित हुने उल्लेख गरिएको छ । यदि योग्य पीडितहरूको सङ्ख्या ४० वा सोभन्दा बढी पुगेमा सम्पत्ति व्यवस्थापन पक्षले साढे ३ करोड डलर भुक्तानी गर्नेछ । तर, सङ्ख्या ४० भन्दा कम भएमा ५० लाख डलर मात्र तिर्ने व्यवस्था गरिएको छ । एप्स्टिन सन् २०१९ अगस्ट १० मा जेलभित्रै मृत फेला परेका थिए ।
एप्स्टिनको सम्पत्ति हेरचाह गरिरहेका उनका पूर्ववकिल ड्यारेन इन्डिक र पूर्व लेखापाल रिचर्ड कानले आफूहरूले कुनै गलत कार्य नगरेको दाबी गर्दै आएका छन् । प्रस्तावित फैसलामा पनि उनीहरूले गल्ती स्वीकार गरेको वा भविष्यका अन्य दाबीका लागि उत्तरदायी हुने अर्थ नलाग्ने स्पष्ट पारिएको छ ।
यो सहमतिले अन्तिम रूप लिनका लागि न्युयोर्कको सङ्घीय न्यायाधीशबाट स्वीकृति पाउन बाँकी छ ।
पीडित पक्षका वकिलहरूले तत्काल यसबारे विस्तृत टिप्पणी नगरे पनि कम्तीमा ४० जना पीडितसँग अझै अन्तिम समझदारी हुन बाँकी रहेको बताइएको छ । अमेरिकी न्याय मन्त्रालयले एप्स्टिनको अनुसन्धानसँग सम्बन्धित लाखौँ डकुमेन्ट, तस्बिर र भिडियो सार्वजनिक गरेलगत्तै यो मुआब्जा प्रस्ताव बाहिर आएको हो ।
शक्तिशाली राजनीतिज्ञ, व्यापारी र चर्चित व्यक्तित्वहरूसँग सम्बन्ध रहेका एप्स्टिनको यो प्रकरणले विश्वभर ठुलो हलचल ल्याएको थियो । प्रस्तावित मुआब्जालाई लामो समयदेखि चल्दै आएको यो संवेदनशील कानुनी झमेलालाई किनारा लगाउने अन्तिम प्रयासका रूपमा हेरिएको छ ।