गोरखा । मनमोहन कार्डियोथोरासिक भास्कुलर एण्ड ट्रान्सप्लान्ट सेन्टरमा एमआइसीएस प्रविधिबाट एक पुरुषको जन्मजात मुटुको प्वालको सफल शल्यक्रिया गरिएको छ ।
ओखलढुंगा चिसंखुगढी गाउँपालिका ६ का ४२ वर्षीय पुरुषको एमआइसीएस प्रविधिबाट जन्मजात मुटुको प्वालको सफल ओपन हार्ट सर्जरी गरिएको हो ।
मुटु रोग विशेषज्ञ प्राडा अनिल भट्टराईका अनुसार एमआइसीएस भन्नाले काखीमुनि सानो प्वाल पारेर गरिने आधुनिक शल्यक्रिया प्रविधि हो । यसमा छाती पुरै चिर्नु पर्दैन । यस किसिमको आधुनिक प्रविधिबाट गरिएको यो शल्यक्रिया नेपालमै पहिलो पटक भएको उनले बताए ।
ती बिरामी करिब डेढ महिना अघि छाति दुखेको समस्या लिएर अस्पताल पुगेका थिए । इको कार्डियोग्राफी गर्दा उनको मुटुमा जन्मजात प्वाल अर्थात् भेन्ट्रिकुलर सेप्टल डिफेक्ट (भीएसडी) को समस्या भेटिएको डा भट्टराईले बताए । मुटुमा प्वाल भएकै कारण ती बिरामीलाई पहिले पनि २ पटक संक्रमणको समस्या भइसकेको थियो ।
उक्त समस्या भेटिएपछि उनी १ साताअघि शल्यक्रियाका लागि अस्पताल भर्ना भएका थिए । शुक्रबार भने उनी डिस्चार्ज भएको र स्वास्थ्य अवस्था सामान्य रहेको डा भट्टराईले जानकारी दिए ।
डा भट्टराईको नेतृत्वमा भएको शल्यक्रियामा डा रवि बराल, डा प्रभात खकुरेल, डा समिर यादव र प्राडा विश्वास प्रधान सहभागी थिए ।
