गाेरखा । सरकारले पाठेघरको मुखको क्यान्सर विरुद्धको एचपिभी खोप अभियान माघ २५ गतेबाट देशैभर सुरु गरेकाे । किशोरी लक्षित अभियानमा सहभागी भएर खोप लगाउन सरकारले सबैमा आग्रह समेत गरेको छ ।
सरकारले सबै जिल्लामा एकै दिनमा सुरु नगरेपनी समय सिमा ताेकेर फागनु १५ गतेसम्म खाेप लगाइ सक्न भनेकाे छ ।
एचपिभी खोप बारे सरकारले विभिन्न माध्यमबाट यो सम्बन्धी जानकारी प्रवाह गरेपनि अझै केही जिज्ञासा छन् । एचपिभी खोप बारे ५ जानकारी बारे यहाँ स्पष्ट पार्न खोजिएको छ ।
१. खोप कहिले दिइन्छ ?
एचपिभी खोप माघको अन्तिम सातादेखि फागुनको दोस्रो सातासम्म दिइनेछ । तर खाप सेवा सञ्चालन हुने मिति र समय पालिका तथा विद्यालय अनुसार फरक हुन सक्ने भएकाले सम्बन्धित विद्यालय व नजिकका स्वास्थ्य संस्थामा सम्पर्क गरी खोप लगाउन अनुरोध गरिन्छ ।
२. कसलाई खोप दिइन्छ ?
कक्षा ६ मा अध्ययनरत सबै छात्रा तथा विद्यालय बाहिर रहेका १० वर्ष उमेरका किशोरीहरुलाई खोप दिइनेछ । साथै, गत वर्षको एचपिभी खोप अभियानबाट छुट भएका हाल कक्षा ७ देखि १० सम्म अध्ययनरत छात्रा तथा विद्यालय बाहिर रहेका ११ देखि १४ वर्ष उमेका किशोरीहरुलाई पनि यो खोप प्रदान गरिनेछ ।
३. खोप कहाँ दिइन्छ ?
यो खोप मुख्यतः विद्यालय केन्द्रित खोप केन्द्रहबाट दिइनेछ । विद्यालय जाने छात्राहरुले आफ्नै विद्यालय वा नजिकको विद्यालयमा खोप लगाउन सक्नेछन् । विद्यालय नजाने किशोरीहरुले पनि नजिकको विद्यालय वा खोप सेवा सञ्चालन हुने स्वास्थ्य संस्थाबाट खोप लगाउन सक्नेछन् ।
४. यो एचपिभी खोप कति मात्रा दिइन्छ ?
एचपिभी खोप १ मात्रा मात्र दिइन्छ । यो १ मात्राले नै करिब शतप्रतिशत प्रभावकारिता देखाएको छ । यसअघि एचपिभी खोप लगाइसकेकाले थप मात्रा लगाउनु पर्दैन ।
५. एचपिभी खोप कत्तिको सुरक्षित छ ?
एचपिभी खोप अत्यन्तै सुरक्षित छ । विश्व स्वास्थ्य संगठनद्वारा गुणस्तर सुनिश्चित गरिएको खोप मात्र नेपालमा खरिद तथा प्रयोग गरिन्छ र औषधि व्यवस्था विभागबाट समेत प्रयोगको अनुमति प्राप्त छ । गत वर्ष करिब १६ लाख किशोरीहरुले खोप लगाएका थिए र कसैमा पनि गम्भीर असर देखिएको थिएन ।