गोरखा । गण्डकी प्रदेश सरकारले गोरखा अस्पताल बिकास समितिको अध्यक्षमा कृण्ण ढकाललाई नियुक्त गरेको छ । प्रदेश सरकारको माघ ४ गते बसेको मन्त्रिपरिषद् बैठकले अध्यक्षमा ढकाललाई नियक्त गरेको हो । प्रदेश सरकारले आफ्नो मातहतका ५ वटा अस्पतालमा बिकास समितिको अध्यक्षहरु नियक्त गरेको छ ।
निर्वाचनको आचारसंहिता सुरु हुनुअघि नै ५ वटा अस्पताललाई ठिक ढंगले अगाडि बढाउन अध्यक्ष र सदस्य नियुक्त गरिएको गण्डकी प्रदेश सरकारका अर्थमन्त्री तथा प्रवक्ता डा. टकराज गुरुङले जानकारी दिए ।
प्रवक्ता गुरुङले क्षमता र दक्षताका आधारमा अध्यक्ष नियुक्त गरिएको बताए ।
प्रदेश सरकारले गोरखा, धौलागिरि आयुर्वेद अस्पताल बागलुङ र मातृशिशु मितेरी अस्पताल कास्की, आँपपिपल गोरखा र गण्डकी आयुर्वेद अस्पताल लेखनाथको अध्यक्ष नियुक्त छ ।
प्रदेश अस्पताल अन्तरर्गत रहेको गोरखा अस्पतालमा ढकाललाई अध्यक्षमा नियुक्त गर्दा महिला सदस्यमा विद्या मास्के नियुक्त भएकी छिन् । खुला सदस्यमा सानुकाजी वन्त नियुक्त भएका छन् ।
गण्डकी प्रदेश सरकारले योग्यताका आधारमा अस्पतालहरूको व्यवस्थापन समितिको अध्यक्ष नियुक्त गर्ने गरी नयाँ गठनादेश जारी गरेको थियो ।
सम्बन्धित जिल्लाका स्थानीयवासी रहेका स्नातक पास गरेका व्यक्तिहरूबाट अध्यक्ष नियुक्त गर्ने कार्यविधिमा छ । नयाँ गठनादेशअनुसार १०० र ५० शय्याको अस्पतालमा स्नातक तह उत्तीर्ण गरेको हुनुपर्ने व्यवस्था छ भने सबै अस्पतालको अध्यक्ष हुन सम्बन्धित जिल्लाकै स्थायी वासिन्दा हुनुपर्ने छ ।
२५ शय्यासम्मका अस्पतालमा भने शैक्षिक योग्यता तोकिएको छैन । १०० र ५० शय्याका अस्पताल व्यवस्थापन सदस्य हुनका लागि प्लस टु वा प्रवीणता तहको हुनुपर्ने व्यवस्था छ । अस्पतालमा ९ सदस्यीय व्यवस्थापन समिति हुने कार्यविधि छ ।
१०० र ५० शैय्याका हकमा स्थानीय तहको प्रमुख वा निजले तोकेको कार्यपालिका सदस्य, कम्तीमा स्नातक तह उत्तीर्ण सम्बन्धित जिल्लाको व्यक्तिबाट मन्त्रालयले मनोनित गरेको १ महिलासहित २ जना, जिल्ला प्रशासन, प्रदेश लेखा नियन्त्रक कार्यालय वा कोष तथा लेखा नियन्त्रक कार्यालयको अधिकृत प्रतिनिधि, समितिले मनोनित गरेको अस्पतालमा कार्यरत स्थायी विशेषज्ञ चिकित्सकबाट १ जना, अस्पतालको नर्सिङ प्रमुख र सदस्य सचिवमा मेडिकल सुपरिन्टेन्डेन्ट रहने छन् । २५ शय्याको अस्पतालमा ७ सदस्यीय समिति रहने छन् ।