गाेरखा । युवा तथा खेलकुदमन्त्री बब्लु गुप्ताले मन्त्री पदबाट राजीनामा दिएका छन् । आगामी फागुन २१ गते हुने प्रतिनिधिसभा सदस्य निर्वाचनमा उम्मेदवारी दिने तयारीस्वरूप उनले आफ्नो पदबाट राजिनामा दिएका हुन् ।
उम्मेदवारी दर्ताको सिलसिलामा सिरहा पुगेका गुप्ताले इमेलमार्फत प्रधानमन्त्री तथा मन्त्रिपरिषद्को कार्यालयमा राजीनामा पठाएको हाे । उनले आफ्नो राजीनामाबारे प्रधानमन्त्रीलाई टेलिफोनमार्फत समेत जानकारी गराइसकेको बताएका छन् ।
जेनजी आन्दोलनपछि गठन भएको वर्तमान सरकारमा गुप्ताले युवा तथा खेलकुद मन्त्रालयको जिम्मेवारी सम्हाल्दै आएका थिए । उनी वर्तमान मन्त्रिपरिषद्मा नयाँ पुस्ता अर्थात् जेनजीको प्रतिनिधित्व गर्ने प्रमुख अनुहार थिए ।
निर्वाचनमा सक्रिय हुन र कानुनी प्रक्रिया पुरा गर्न उनले निर्वाचनअघि नै सरकारबाट बाहिरिने निर्णय लिएका हुन् ।