गोरखा । उत्तरी गोरखाको मनास्लु पदमार्गमा जाने बिदेशीहरुको संख्या झण्डै १५ हजार पुगेको छ ।
अग्रेजी बर्ष २०२५ मा मनास्लु पदमार्गमा कुल १४ हजार ९८० जना स्वदेशी तथा विदेशी पर्यटक पुगेको मनास्लु संरक्षण क्षेत्र आयोजनाको कार्यालय गोरखाले जानकारी दिएको हो ।
कार्यालय प्रमुख सन्तोष शेरचनका अनुसार १४ हजार ३९६ जना तेस्रो देशका विदेशी र सार्क राष्ट्रको ३४४ जनाले पदमार्ग प्रयोग गरेका थिए । सन २०२५ मा कुल १४ हजार ३९६ जना विदेशीले उक्त मार्ग प्रयोग गरेको उनले जानकारी दिए ।
उक्त पदमार्गमा जाने मध्य ८ हजार १८४ जना पुरुष, ६ हजार ५५४ जना महिला र २ जना अन्य रहेका थिए ।
उक्त मार्गमा जाने विदेशी मात्र नभएर नेपाली पनि हुने गरेका छन् । सोही अवधिमा कुल २४० जना नेपालीले उक्त पदमार्गमा पुगेको कार्यालयका प्रमुख शेरचनले बताए ।
उनका अनुसार २१० जना पुरुष र ३० जना नेपाली महिलाले पदमार्ग प्रयोग गरेका थिए ।
गत अग्रेजी बर्ष २०२४ मा भने उक्त पदमार्ग प्रयोग गर्नेको संख्या १० हजार ६०५ जना रहेको थियो ।
आयोजनाले उक्त अवधिमा संरक्षण क्षेत्र प्रवेश शुल्कबापत कुल ३ करोड ८५ लाख ८६ हजार ७९६ रुपैयाँ ५० पैसा आम्दानी गर्न सफल भएको आयोजनाको कार्यालयले जानकारी दिएको छ ।
तस्बिर : मनास्लु क्षेत्र संरक्षण आयाेजनाकाे कार्यालय
