गोरखा । गोरखामा पहिलो पटक आमन्त्रित गोल्डकप फुटबलको आयोजना गरिएको छ ।
जिल्ला खेलकुद बिकास समितिले जिल्लामा नै पहिलो पटक ठूलो धनराशी भएको ‘पृथ्वी नारायण गोल्डकप फुटबल प्रतियोगिता–२०८२ को आयोजना गरेको हो ।
गण्डकी प्रदेश सरकार, मुख्यमन्त्री तथा मन्त्री परिषदको कार्यालय, युवा तथा खेलकुद मन्त्रालय, गोरखा नगरपालिका, गण्डकी प्रदेश खेलकुद परिषद र अखिल नेपाल फुटबल संघ प्रबद्र्वक रहेको प्रतियोगिता आउदो माघ २४ गतेदेखी फागुन २ गतेसम्म सञ्चालनमा आउने खेलकुद बिकास समितिका अध्यक्ष प्रेम बहादुर तामाङले बताए ।
खेल गोरखा नगरपालिका–१० को छेवेटारमा रहेको खेलकुद मैदानमा हुने पनि उनले जानकारी दिए ।
प्रतियोगितामा आयोजक सहित देशैभरबाट ८ वटा समूहको सहभागिता हुने अनुमान गरिएको छ ।
प्रतियोगिता भर ८२ लाख खर्च हुने अनुमान गरेको समितिले बिजेता समूहलाई नगद ८ लाख सहित ट्रफि र कप एवं उप–बिजेतालाई ४ लाख नगद प्रदान गरिने जानकारी दिएको छ ।
ए डिभिजन क्लबहरुको सहभागिता रहने प्रतियोगितामा विभिन्न विधामा समेत पुरस्कारको समेत ब्यवस्था गरेको जनाएको छ ।
प्रतियोगिता गर्न प्रदेश सरकारबाट १५ लाख र गोरखा नगरपालिकाले ५ लाख दिने सहमती भएको पनि अध्यक्ष तामाङले बताए ।
प्रतियोगितामा विभागीय टोलीलाई समेत समावेश गर्न पहल भईरहेको जिल्ला खेलकुद बिकास समितिले जानकारी दिएको छ ।
