गोरखा । १३ औं जिल्ला स्तरिय राष्ट्रपती रनिङ शिल्ड पुस २४ गतेदेखी २६ गतेसम्म हुने भएको छ ।
जिल्ला खेलकुद बिकास समितिको आयोजना तथा आरुघाट, धार्चे र चुमनुब्री गाउँपालिकाको सह–आयोजनामा आरुघाटमा हुने भएको हो ।
खेल सम्वन्धी जानकारी दिन आयोजित पत्रकार सम्मेलनमा समितिका अध्यक्ष प्रेम बहादुर तामाङले रनिङ शिल्ड आरुघाट गाउँपालिका–९ को आरुघाट बजारमा रहेको भिमोदय माविको खेलकुद मैदानमा हुने जानकारी दिए ।
उनका अनुसार रनिङ शिल्डमा जिल्लाका ११ वटै स्थानिय तहले सहभागिता जनाउने छ ।
भलिबल, एथलेटीक्स, कबडी, कराते र तेकवान्दो बिद्यामा हुने रनिङ शिल्डमा करिब ६०० जना बिद्यार्थीहरुले सहभागिता जनाउने छन् ।
आरुघाटमा भलिबल, एथलेटीक्स र कबडी हुने छ भने गोरखा सदरमुकाममा कराते र तेकवान्दो खेल हुने छ ।
रनिङ शिल्डबाट एथलेटीक्समा २२ जना, भलिबल र कबडीबाट १८–१८ जना तथा कराँते र तेकवान्दोबाट १२–१२ जना छनौंट हुने छन् । छनौंट भएका खेलाडीहरुले केही समय पछी बागलुङ हुन लागेको प्रदेश स्तरीय रनिङ शिल्डमा सहभागिता जनाउने छन् ।
खेलको उद्घाटन गण्डकी प्रदेश सरकारका मुख्यमन्त्री सुरेन्द्र राज पाण्डे गर्ने आयोजक समितिले जानकारी दिएको छ ।
पत्रकार सम्मेलनमा एन्फा गण्डकी प्रदेशका अध्यक्ष दिपेन्द्र श्रेष्ठ, एन्फा गोरखाका अध्यक्ष, एथलेटीक्स संघ गोरखाका अध्यक्ष राजकुमार श्रेष्ठ लगायतका विभिन्न खेलका संघ संस्थाका पदाधिकारीहरुको उपस्थिती रहेको थियो ।