एजेन्सी । इन्डोनेशियाका गिड प्रियन्दना टी–२० अन्तर्राष्ट्रिय क्रिकेटमा १ ओभरमा ५ विकेट लिने विश्वको पहिलो बलर बनेका छन् । बालीमा हिजाे कम्बोडियासँगको खेलमा २८ वर्षीय प्रियान्दनाले यो उपलब्धि हासिल गरेका हुन् ।
इन्डोनेशियाले दिएको १६८ रन पछ्याएको कम्बोडियाले १५ ओभरको खेल सकिँदा ५ विकेट गुमाएर १०६ रन बनाएको थियो । त्यसपछि बलिङमा आएका इन्डोनेशियाका गीड प्रियान्दनाले १६औं ओभरको लगातार ३ बलमा विकेट लिएर ह्याट्रिक पूरा गरे ।
त्यसपछि उनले १ बल डट राखे र अर्काे बलमा फेरि विकेट लिए । त्यसपछि १ वाइड दिएका उनले अर्काे विकेट लिएर कम्बोडियालाई १०७ रनमा रोके । यो खेल इन्डोनेशियाले ६० रनले जित्यो । कम्बोडियाका कप्तान लुक्मान बटले सबैभन्दा धेरै ४८ रन बनाए ।
यसअघि टस हारेर ब्याटिङ गरेको इन्डोनेशियाले २० ओभरमा ५ विकेट गुमाएर १६७ रन बनायो । इन्डोनेशियाका धर्म केसुमाले नटआउट ११० रन बनाए । कम्बोडियाका शाह अबरार हुसेन र एटिएन बेउक्सले समान २-२ विकेट लिए ।
