गोरखा । १२ औं गोरखा महोत्सव यही पौष १४ गतेदेखी २८ गतेसम्म सञ्चालनमा आउने भएको छ ।
गोरखा उद्योग बाणिज्य संघको आयोजनामा सदरमुकाममा रहेको खेलकुद मैदानमा महोत्सवमा आयोजना गरिएको हो ।
प्रदेश स्तरीय महोत्सवको गण्डकी प्रदेशका मुख्यमन्त्री सुरेन्द्रराज पाण्डेले उद्घाटन गर्ने कार्यक्रम तय भएको गोरखा उद्योग बाणिज्य संघका अध्यक्ष भगवानबावु मास्केले बताए ।
सोही महोत्सव यस अघि पौष ४ गतेदेखी १४ गतेसम्म गर्ने भनिएता पनि विभिन्न कारणले गर्न नसकिएको उनले जानकारी दिए ।
महोत्सवकोलागि विभिन्न २२ उप–समिति बनाएर काम सुरु गरेको आज बिहान भएको पत्रकार सम्मेलनमा जानकारी गराइएको थियो । कार्यक्रममा बोल्दै अध्यक्ष मास्केले क्रेता र बिक्रेता बिचको पुलको कामकोलागि मात्र महोत्सवको आयोजना गरिएको बताए ।
उनका अनुसार महोत्सव स्थलमा १०० वटा स्टल राखिने छ । जहाँ घरेलु उत्पादनदेखी किसानले उत्पादन गरेको सबै प्रकारका सामाग्रीहरु प्रर्दशनका साथै विभिन्न संस्कृती झल्कने सामाग्रीहरु प्रर्दशन हुने छ ।
१५ दिनसम्म चल्ने महोत्सवमा १ लाख मानिसले अबलोकन गर्ने र करिब ३ करोड रुपैयाँ बरावरको कारोबार हुने अनुमान गरिएको छ ।
महोत्सव अवधिभर ८५ लाख रुपैयाँ खर्च हुने अनुमान पनि अध्यक्ष मास्केले जानकारी दिए ।