गाेरखा । दोस्रो संस्करणको नेपाल प्रिमियर लिग (एनपीएल) क्रिकेट प्रतियोगिता अन्तर्गत लिग चरणका सबै खेलहरु हिजै सकिएका छन् ।
त्रिवि क्रिकेट रंगशालामा लिग चरणको अन्तिम खेलमा अघिल्लो संस्करणको बिजेता जनकपुर बोल्ट्समाथि कर्णाली याक्सले ३ रनको रोचक जित निकालेको थियाे ।
अन्तिम खेलमा जित निकालेसँगै ७ खेलबाट ४ अंक जोडेर कर्णाली छैटौं स्थानमा छ । साविक विजेता जनकपुर भने २ अंकसहित पुछार अर्थात् आठौं स्थानमा पुग्यो । जनकपुरले १ खेलमा मात्र जित्न सफल भएकाे थियाे ।
पहिले व्याटिङ गरेको कर्णालीले जनकपुर विरुद्ध २० ओभरमा ९ विकेट गुमाउँदै १२९ रन जोडेको थियो । १३० रनको लक्ष्य पछ्याएको जनकपुर ७ विकेट गुमाउँदै १२६ रनमै समेटियो । अंक तालिकामा सुदूरपश्चिम रोयल्स ७ खेलबाट ६ जित निकाल्दै १२ अंक जोडेर शीर्ष बन्यो ।
दोस्रो स्थानको विराटनगर किंग्स र तेस्रो स्थानको काठमान्डु गोर्खाजले ५–५ जीत निकाल्दै १० अंक जोडे । रनरेटमा भने विराटनगर अघि रह्यो । चौथो बनेको लुम्बिनीले ४ खेलमा जित र ३ खेलमा हार बेहोर्दै ८ अंक जोडेको छ ।
यी ४ टोली प्लेअफमा पुगेका छन् । अंक तालिकामा पोखरा एभेन्जर्स पाँचौ भएको छ । उसले ६ अंक जोडेको छ । चितवन राइनोज पनि ४ अंकसहित सातौं स्थानमा छन् ।
एनपीएलमा आज भने कुनै पनि खेल छैन । प्लेअफमा भोलि सुदूरपश्चिम र विराटनगरबीच पहिलो क्वालिफायर खेल हुनेछ । यो खेलको विजेता फाइनल पुग्नेछ ।
पराजित हुने टोलीले आउँदो बिहीबार हुने दोस्रो क्वालिफायरमा मौका पाउनेछ । पर्सि काठमान्डु र लुम्बिनीबीच इलिमिनेटरको खेल हुनेछ । जित हात पार्ने टोली दोस्रो क्वालिफायरमा पुग्नेछ भने पराजित हुने टोली बाहिरिनेछ । दोस्रो क्वालिफायरको विजेता पनि आउँदो २७ गते शनिबार हुने फाइनलमा पुग्नेछ ।
