गाेरखा । नेपाल विद्युत् प्राधिकरणका पुराना ७ वटा ग्रिड सबस्टेशन स्वचालित बनेका छन् । विद्युत् प्रणालीलाई आधुनिक, स्वचालित र स्मार्टका रूपमा रूपान्तरण गर्ने दीर्घकालीन रणनीतिसहित १३ वटा ग्रिड सबस्टेशनलाई स्वचालित बनाउन शुरू गरिएको थियो ।
त्यसमध्ये पाँचखाल, बनेपा, पाटन, लैनचौर, बालाजु, चपली र भक्तपुर गरी ७ वटा ग्रिड सबस्टेशन स्वचालित प्रणालीमा आबद्ध गरी सञ्चालनमा ल्याइएको छ । अब यी सबस्टेशनहरू काठमाडाैंको मीनभवनमा रहेको प्राधिकरणको भवनमा बनाइएको नियन्त्रण कक्षबाट सञ्चालन गरिएको छ ।
स्वचालित रूपमा सबस्टेशन सञ्चालन तथा नियन्त्रणका लागि नयाँ नियन्त्रण कक्षसमेत निर्माण गरी सञ्चालनमा ल्याइएको छ । स्यूचाटार, टेकु, मातातीर्थ, चावहिल, के–थ्री र लामासाँघु गरी बाँकी ६ वटा सबस्टेशन २ महिनाभित्र स्वाचालित प्रणालीमा आबद्ध गरिनेछ ।
एशियाली विकास बैंक (एडीबी) को विद्युत् प्रसारण तथा वितरण दक्षता सुदृढीकरण परियोजना अन्तर्गत प्राप्त भएको सहुलियतपूर्ण ऋणमा सबस्टेशनलाई स्वचालित बनाइएको छ । समग्र आयोजनाको लागत झन्डै ६१ करोड रुपैयाँ रहेको छ ।
त्यस्तै देशभरका बाँकी ६४ वटा ग्रिड सबस्टेशन स्वचालित बनाउन एडीबीको सहुलितपूर्ण ऋणमा काम भइरहेको छ । यो काम आउँदो डेढ वर्षभित्र सम्पन्न गर्ने लक्ष्य राखिएको छ । त्यसपछि सम्पूर्ण ग्रिड सबस्टेशन स्वचालित हुनेछन् ।
