गाेरखा । नेपाल प्रिमियर लिग (एनपीएल) क्रिकेटमा हिजाे साँझ भएकाे खेलमा पोखरा एभेन्जर्सले कर्णाली याक्सलाई ३४ रनले हराएको छ । पोखराले दिएको २०२ रनको लक्ष्य पछ्याएको कर्णाली १९ ओभरमा १६७ रन बनाएर सबै विकेट गुमाएकाे थियाे ।
कर्णालीका मार्क वाटले ५९ रन बनाए । पोखराका धनञ्जय लक्क्ष्न र रिशी धवनले समान ३ तथा किरण थगुन्ना, सन्दीप क्षेत्री र कुशल भुर्तेलले समान १-१ विकेट लिए ।
त्यसअघि कीर्तिपुरको त्रिवि किकेट रङ्गशालामा टस हारेर पहिला ब्याटिङ गरेको पोखराले निर्धारित २० ओभरमा दुई विकेट गुमाएर २०१ रन बनाएकाे थियाे । कर्णालीले जीतका लागि २०२ रनको लक्ष्य पाएको थियाे ।
पोखराका एडम रोसिङटनले शतक बनाए । उनी ५८ बलमा एक सय ८ रनमा अविजित रहे । जोसन रोयले ४६ रन बनाए । कर्णालीका मार्क वाट र गुलसन झाले १-१- विकेट लिए ।
यो जीतसँगै पोखरा ५ खेलमा ४ अङ्कसहित तालिकाको चौथो स्थानमा छ । प्लेअफमा पुग्ने आशालाई कायम राख्न टोलीले बाँकी रहेको २ खेल जित्नु पर्ने हुन्छ ।
पराजित भएको कर्णाली ६ खेलमा २ अङ्कसहित सातौं स्थानमा छ । कर्णाली प्लेअफको समीकरणबाट बाहिरिने पहिलो टोली बनेको छ ।
