गाेरखा । नेपाल प्रिमियर लिग (एनपीएल) क्रिकेटमा हिजाे साँझ भएकाे खेलमा सुदूरपश्चिम रोयल्सले जनकपुर बोल्ट्सलाई हराएकाे छ । खेलमा सुदूरपश्चिमले साविक विजेता जनकपुर बोल्ट्सलाई ६ विकेटले पराजित गरेको हो । जित संगै सुदूरपश्चिम रोयल्स प्ले अफमा पुगेको छ ।
जनकपुरले दिएको १४६ रनको लक्ष्य पछ्याएको सुदूरपश्चिमले १७ ओभर ४ बलमा ४ विकेट गुमाएर भेटायो । सुदूरपश्चिका इसान पाण्डेले ५६ र बिनोद भण्डारीले ४२ रन बनाए । जनकपुरका माज सदक्वट २, सञ्जय कृष्णमूर्ति र आदित्य महताले समान १-१ विकेट लिए ।
त्यसअघि कीर्तिपुरको त्रिवि क्रिकेट रङ्गशालामा टस जितेर ब्याटिङ गरेको जनकपुरले ८ विकेट गुमाएर १४५ रन बनाएकाे थियाे ।
जनकपुरका सञ्जय कृष्णमूर्तिले ५० र जेन निकोल लफ्टि इटनले ३९ रन बनाए । सुदूरपश्चिमका अविनाश बोहराले ४, स्कट कुग्गेलिजनले ३ र दीपेन्दसिंह ऐरीले १ विकेट लिए ।
यो जीतसँगै सुदूरपश्चिम ५ खेलमा १० अङ्कसहित शीर्ष स्थानमा छ । लगातार चौथो खेलमा पराजित जनकपुर तालिकाको पुछारमा छ ।
