साँकेतिक तस्बिर
गोरखा । गोरखामा अन्तरजातीय बिवाह गरेर बच्चाकाे जन्म भएपछी भागेका धादिङका युवकलाई प्रहरीले पक्राउ गरेकाे छ ।
धादिङ जिल्ला, गजुरी गाउँपालिका-२, मलेखु घर भएका २२ वर्षीय मिलन श्रेष्ठलाई धादिङ प्रहरीको समन्वयमा गजुरी गाउँपालिका-६ काे राम्चेबाट पक्राउ गरेर गाेरखा ल्याएकाे हो ।
पक्राउ परेका श्रेष्ठले गोरखाको शहिदलखन गाउँपालिका-१, बक्राङ माइती भएकी मनिका परियारसँग अन्तरजातिय विवाह गरेका थिए । तर, विवाहपश्चात् गर्भवती भएपछि पत्नी दलित समुदायकी भएको भन्दै निरन्तर हेला–होचो गर्नुका साथै विभेद गरेर फरर भएका थिए ।
मनिकाले केही महिना अगाडी मात्रै छोरा जन्माएकी थिइन । बिवाह र जन्मदर्ता समेत नगरेर फरार भएका युवकलाई गाेरखा प्रहरीले धादिङ प्रहरीकाे समन्वयमा हालै पक्राउ गरी गाेरखा चलान गरेकाे थियाे ।
प्रहरीले पक्राउ परेका युवक बिरुद्ध जातीय विभेद शिर्षकमा मुद्धा दर्ता गरेकाे जिल्ला प्रहरी कार्यालय गोरखाका प्रहरी नायव उपरीक्षक एवं सूचना अधिकारी ईन्द्र प्रसाद सुवेदीले बताए ।
पीडित परियारले न्याय माग्दै जिल्ला प्रहरी कार्यालय गोरखामा केही समय अगाडी जाहेरी दर्ता गरेकाे थियाे । सोही उजुरीका आधारमा प्रहरीले श्रेष्ठलाई पक्राउ गरेको डिएसपी सुवेदीले जानकारी दिए ।
उनका अनुसार श्रेष्ठलाई हिजाे आइतबार पक्राउ गरेर गाेरखा ल्याइएकाे हो । पक्राउ परेका श्रेष्ठमाथि जिल्ला अदालत गोरखाबाट ५ दिनको म्याद थप गरी अनुसन्धान सुरु गरिएकाे सूचना अधिकारी सुवेदीले जानकारी दिए ।
