गोरखा । धार्चे मनासलु पर्यटन विकास समितिको आयोजना र धार्चे गाउँपालिका कार्यालयको आर्थिक सहयोगमा ऐतिहासिक कालोपोखरी प्राकृतिक पूजा सम्पन्न भएको छ ।
धार्चे गाउँपालिका-२ स्थित ३ हजार ४६६ मिटर उचाइमा अवस्थित कालोपोखरीमा यहीँ साउन २३, २४ र २५ गते प्राकृतिक पूजा गरिएको समितिका अध्यक्ष सानेबहादुर गुरुडले जानकारी दिए ।
उनका अनुसार प्रत्येक वर्ष गरिने यस प्राकृतिक पूजा कार्यक्रममा यस वर्ष विशेष रूपमा बिभिन्न सांस्कृतिक र धार्मिक कार्यक्रमहरु समेत सञ्चालन गरिएको थियो । कालोपोखरीको मुलदेउता प्राच्यु ल्हले प्रकृतिका महत्वपूर्ण तत्वहरू जस्तै हावाहुरी, पानी, झरी, असिना र जंगली जनावरहरू बाघ, भालुलाई नियन्त्रण गर्दै लेकको गोठाला र जन समुदायको जीवन रक्षा गर्ने जनविश्वासअनुसार प्राकृतिक पूजा गरिँदै आएको छ ।
यस वर्षको पूजा धार्चे मनासलु पर्यटन विकास समितिको पहल र धार्चे गाउँपालिकाका आर्थिक सहयोगमा विविध कार्यक्रमसहित सम्पन्न भएको अध्यक्ष गुरुडले बताए ।
कार्यक्रममा धार्चे गाउँपालिकाका वडा नं १, २, ५ र ६ का साथै छिमेकी धादिङ जिल्लाको रुबी भ्याली गाउँपालिका क्षेत्रबाट करिब डेढ सय भन्दा बढी भक्तजनहरू सहभागी भएका थिए ।
पुजामा भक्तजनहरूले कालोपोखरीको पवित्र जलबाट आशिर्वाद ग्रहण गरी प्रकृतिप्रति श्रद्धा व्यक्त गरे। साथै, पर्यावरण संरक्षण र सांस्कृतिक संरक्षणका विषयमा समुदायमा सचेतना फैलाउने पूजामार्फत विशेष सहयोग पुगेको उनको भनाई छ ।
उनका अनुसार कालोपोखरी प्राकृतिक पूजा नेपालको सांस्कृतिक सम्पदाको अमूल्य हिस्सा भएकाले स्थानीय धार्मिक मान्यता र परम्परालाई संरक्षण गर्दै पर्यटन प्रवर्द्धनमा समेत ठूलो भूमिका खेल्ने विश्वास लिइएको छ । प्राकृतिक सौन्दर्य र सांस्कृतिक समृद्धिले भरिएको धार्चे क्षेत्रमा भविष्यमा यस किसिमका कार्यक्रम थप आयोजना गरि स्थानिय पर्यटनलाई अझ सशक्त बनाउने लक्ष्य राखिएको छ ।
