गोरखा । पर्यटकलाई जानकारी एवं मार्ग दर्शनकालागी मनास्लु पदमार्गको विभिन्न क्षेत्रमा ५३ वटा मार्किङ पोल र साइन पोष्ट राखिएको छ ।
गए आर्थिक बर्ष २०८१–०८२ मा मनास्लु संरक्षण क्षेत्र आयोजनाले पदमार्गमा १६ वटा मार्किङ पोल र ३५ वटा साइन पोष्ट राखेको आयोजनका प्रमुख सन्तोष शेरचनले बताए ।
‘बाह्य तथा आन्तरिक पर्यटकलाई जानकारी एवं मार्ग दर्शन होस भनेर पदमार्गमा मार्किङ पोल र साइन पोष्ट राखिएको हो’ उनले भने ‘पहिलेभन्दा अब उक्त मार्ग प्रयोग गर्नेलाई ति पोल र पोष्टले अझै सहज हुने छ ।’
मार्किङ पोल नुब्री भ्याली तर्फ लार्के बजारदेखी भिमथाङसम्म १६ वटा राखिएको आयोजनाको गोरखा कार्यालयले जनाएको छ । यता साइन पोष्ट भने चुम भ्याली तर्फ १९ वटा (गणेश हिमाल जाने बाटोमा १० वटा सहित), नुब्री भ्याली तर्फ १४ र सिर्दीबासमा २ वटा स्थानमा जडान गरिएको आयोजना प्रमुख शेरचनले जानकारी दिए ।
लार्के बजारदेखी भिमथाङसम्म अब कुल १२४ वटा मार्किङ पोल पुगेको छ । यस अधि १०८ वटा मात्र रहेको आयोजनाले जनाएको छ ।
आयाजनाले पदमार्गमा थप गरेको मार्किङ पोलमा कालो, सेतो र पहेला रंग लगाएर राखिएको छ । जसले गर्दा पर्यटकले पदमार्ग पहिचान गर्न सहज बनाउने छ ।
साईन पोष्टहरुमा भने स्थानको नाम, त्यसको उचाई र त्यहाँबाट अर्को बस्ती पुग्न लाग्ने संभावित समय राखिएको प्रमुख शेरचलने जानकारी दिए ।
गएको आर्थिक बर्षमा नै मनास्लु बेश क्याम्पमा पहिलो पटक मनास्लु बेश क्याम्पमा तपाईहरुलाई स्वागत छ र बेश क्याम्पको उचाई अंकित भएको साईनबोर्ड राखिएको पनि उनले बताए ।
यो आर्थिक बर्ष ०८२–०८३ मा पनि दुवै क्षेत्रलाई समेटने गरी २५ वटा मार्किङ पोल र ३५ वटा साइन पोष्ट राखिने आयोजनाको कार्यालयले जनाएको छ ।