गोरखा । उत्तरी गोरखाको मनास्लु संरक्षण क्षेत्रमा पर्ने मनास्लु पदमार्गमा आउने पर्यटहरुमा सबैभन्दा धेरै फ्रान्सकाे आएका छन् ।
आर्थिक बर्ष २०८१-०८२ मा फ्रान्सका १ हजार ४०७ जना पर्यटकले मनास्लु क्षेत्रको भ्रमण गरेका छन् । जस मध्य ७६३ पुरुष र ६४४ महिला रहेकाे आयाेजनाका प्रमुख सन्ताेष शेरचनले बताए ।
उनका अनुसार बिदेशीहरुकालागी पदमार्ग खुल्ला भएयता अहिलेसम्मकै धेरै विदेशी पर्यटक घुम्न पुगेका छन् । ०८१ साउनदेखि ०८२ असार मसान्तसम्मको मनास्लु क्षेत्रमा कुल १२ हजार ५१२ जना विदेशी पर्यटक घुम्न पुगेको मनास्लु उनले बताए ।
‘‘यसबर्ष मनास्लु क्षेत्रको भ्रमणमा पुग्ने विदेशी पर्यटकको संख्या अहिलेसम्मकै सर्वाधिक हो, उनले भने,‘‘मनास्लु क्षेत्रमा पछिल्लोसमय विदेशी पर्यटकको आर्कषण बढ्दै गएको छ ।’’
गएको आर्थिक बर्षमा सार्क राष्ट्रका २५३ जना, अन्य राष्ट्रका विदेशी पर्यटक १२ हजार २४८ जनाले मनास्लु क्षेत्रको भ्रमण गरेको उनको भनाई छ ।
उक्त पदमार्गमा जाने जमर्नीका पर्यटकहरु दाेस्राे स्थानमा रहेका छन् । साेही अवधिमा जर्मनीका १ हजार ३३० जना, संयुक्त राज्य अमेरिकाका ९७७ जना, नेदरल्याणका ९३८ जनाले उक्त क्षेत्रकाे भ्रमण गरेका थिए ।
त्यसवाहेक इजरायलका ७७१ जना, बेलायतका ७३२ जना, अष्ट्रेलियाका ६८० जना, स्पेनका ४२८ जना, रसियाका ४२२ जना र क्यानडाका ४१४ जना रहेको छन् भने अन्यदेशका नागरिकहरु पनि मनास्लु क्षेत्र घुम्न पुगेका छन् ।
सोही अवधीमा ११ जना नेपाली पर्यटकले पनि शुल्क तिरेर मनास्लु क्षेत्रको भ्रमण गरेका छन् । सामान्य तया नेपाली पर्यटकलाई शुल्क नलाग्ने भएता पनि शुल्क तिरेर जान्छु भन्नेहरुका रेकर्डमा आधारीत ११ जना भएकाे पनि आयाेजनाकाे कार्यलयले जनाएकाे छ ।
मनास्लु क्षेत्रमा गत आर्थिक बर्ष २०८०-०८१ मा ९ हजार ७८३ जना विदेशी पर्यटकले भ्रमण गरेका थिए । अघिल्लो आर्थिक बर्षको तुलनामा गत आर्थिक बर्षमा २ हजार ७२९ जना बढी विदेशी पर्यटक मनास्लु क्षेत्र घुम्न पुगेको प्रमुख शेरचनले बताए ।
‘‘मनास्लु क्षेत्र जाने पदमार्ग अहिले निक्कै सहज र सुरक्षित पनि बनेको छ, उनले भने, ‘‘पदमार्गको प्रचार–प्रसार उत्तिकै हुँदै गएको छ, त्यहाँ पुग्ने पर्यटकलाई खान र बस्नका लागि सुविधा सम्पन्न होटलहरु निर्माण भएकाले पनि पर्यटकको संख्या बढ्न थालेको हो ।’’
मनास्लु क्षेत्रमा आर्थिक बर्ष २०७९-८० मा ७ हजार ७५०, आर्थिक बर्ष २०७८-७९ मा २ हजार २२२ जना विदेशी पर्यटक घुम्न पुगेका थिए ।
