गोरखा । गाेरखामा रहेका नेपाली सेनाले गोरखाबाट विहिबारदेखि तेस्रो ऐतिहासिक गोरखा–जितगढी एकिकरण पदयात्रा सुरु भएको छ ।
नेपाल एकिकरणका क्रममा तत्कालिन राजा पृथ्वीनारायण शाहले प्रयोग गरेका पदमार्गको प्रवद्र्धन गर्ने उद्देस्यसहित सेनाले गोरखा–जितगढी एकिकरण पदयात्राको थालनी गरेको नेपाली सेना रिपुमर्दन गण गोरखाका गणपति प्रमुख सेनानी असोककुमार क्षेत्रीले जानकारी दिए ।
‘‘ऐतिहासिक महत्व बोकेका कोट, गढी, किल्लाहरुको संरक्षण, सम्बद्र्धन र प्रवद्र्धन गर्दै इतिहासलाई जोगाउने पदयात्राको उद्देस्य हो, उनले भने, ‘‘सोही उद्देस्य लिएर आजदेखि गोरखाहुँदै जितगढीसम्म पदयात्राको थालनी गरिएको छ ।’’ सेनाको टोली ११ दिनमा जितगढी पुग्नेछ ।
गोरखा दरवारस्थित हनुमान भञ्ज्याङ चौताराबाट नेपालको राष्ट्रिय झण्डा, टर्च लाईट र पाँचवटै गणको झण्डा बोकेर सेनाको टोली पदयात्रामा निस्किएको हो ।
टोलीले गाेरखा नगरपालिकाकाे केही भाग हुदै पालुङटारस्थित सतिघाटमा पुगेर तनहुँमा रहेका नेपाली सेनाकाे समूहलाई र तनहुँले पाल्पास्थित सेनाको टोलीलाई झण्डा हस्तान्तरण गर्नेछ ।
टोलीले जितजढीसम्म पुग्दा ३०५ किलोमिटर दूरी पार गर्ने छ । पदयात्रामा पृथ्वीनारायण शाहले खडा गरेका कालीबक्स गण, पुरानो गोरख, बर्दवाणी गण, सवुज गण र जितगढीको लडाइँमा भाग लिएको गुरुबक्स पल्टनको टोली सहभागी भएका छन् ।
त्यस्तैगरी, पाल्पाले रुपन्देही र रुपन्देहीको सेनाको टोली जितगढी पुगेर बैशाख ७ गते विजय उत्सवमा सहभागी हुने कार्यक्रम रहेको प्रमुख सेनानी क्षेत्रीले बताए ।
तत्कालीन ब्रिटिस इस्ट इन्डिया कम्पनी र नेपाल बिच भएको लडाइँमा विजय प्राप्त गरेको दिन वैशाख ७ गतेलाई विजय उत्सवको रूपमा मनाउने गरिँदै आएको छ ।