गोरखा । नेपालकै पहिलो मनकामना केबुलकार आज १ दिनकाे लागि बन्द हुने भएको छ । केबलकारकाे ब्रेक चाेपर र २ वटा टावर मर्मतका लागि आज (बुधबार) १ दिन बन्द गर्न लागेको मनकामना दर्शन प्रालिले जनाएकाे हो ।
प्रालिले सूचना जारी गर्दै मंसिर ५ गते बुधबार र ६ गते बिहीबार केबुलकारकाे ब्रेक चाेपर र टावर नम्बर १ र २ काे परिमार्जन कार्य गर्न बन्द गर्न लागेको जनाएको भएता पनि उक्त कार्य आज एकै दिनका सक्ने भएकाेले आजकाे लागि मात्र बन्द गर्न लागेकाे मनकामना दर्शन प्रालिका नायब प्रबन्धक उज्वल शेरचनले जानकारी दिए ।
उनका अनुसार कम्पनीबाट आएका प्राविधिकहरुले केही दिनदेखी साँझमा काम गरीरहेकाले २ दिन बन्द गर्ने भनिएकाेमा आज १ दिनमा नै काम सम्पन्न हुने भएकाेले आज बन्द गर्न लागेकाे हाे । केबलबार भाेली (बिहीबार) बिहानैदेखी नियमित रुपमा सञ्चालनमा आउने पनि नायब प्रबन्धक शेरचनले बताए ।
नेपालकै प्रसिद्व धार्मिकस्थल मनकामना मन्दिर जाने तिर्थ यात्रीहरुको सुविधाकालागी २०५५ साल मंसिर ८ गतेदेखी मनकामना केबुलकार सञ्चालनमा आएको हो ।
यता आजै मनकामना मन्दिरमा पञ्चमी मेलामा जाने तिर्थयात्रीहरुले भने केबलकार बन्द हुदा केही असहज भएकाे बताएका छन् ।
