मुस्ताङ । याे वर्ष मुस्ताङबाट १६ करोड रुपैयाँ बराबरको भेडाच्याङग्राको व्यापार भएको छ । दशैँका लागि मुस्ताङबाट बिक्री भएका ८ हजार भेडाच्याङग्रामध्य ४ हजार ८०० जिल्लाभित्रका किसानले पालेका र ३ हजार २०० डोल्पा, मुगुुबाट ल्याइएका थिए ।
भेटेरीनरी अस्पताल तथा पशु सेवा विज्ञ केन्द्र मुस्ताङले दिएकाे जानकारी अनुसार ५०० वटा भेडा (च्यालुक) र ७ हजार ५०० च्याङग्रा बिक्री भएको छ । मुस्ताङका किसानले उमेर र तौल अनुसार प्रतिगोटा २८ हजारदेखि ३८ हजार रुपैयाँका दरले च्याङग्रा बेचेकाे पनि कार्यालयले जनाएकाे छ ।
सरदर मूल्यअनुुसार १६ करोड रुपैयाँ बराबरको च्याङग्रा बिक्री भएकाे कार्यालयले जानकारी दिएकाे हाे ।गएको वर्ष ७ हजार भेडाच्याङग्रा बिक्री भएका थिए ।
म्याग्दी, बागलुङ, पर्वत, कास्की, काठमाडाैं लगायतका जिल्ला तथा शहरमा मुुस्ताङका भेडाच्याङग्रा बिक्री भएको छ । अघिल्लो वर्षको तुलनामा उत्पादन बढेको र मूल्य घटेकाका कारण यसपाली भेडाच्याङग्राको व्यापार राम्रो भएको व्यापारीहरुले बताएका छन् ।
विगतमा च्याङग्रा महँगो हुँदा व्यापार घटेको थियो । जडीबुटीयुक्त बुकीमा चरेका च्याङग्राको मासु पोषिलो, तागतिलो र स्वस्थर मानिन्छ ।
