गोरखा । नेपालकै पहिलो केबुलकार मनकामना केबुलकार २६ बर्षपछी डिजिटल डी– कनेक्ट प्रणाली मार्फत सञ्चालनमा आएकाे छ । २ दशकभन्दा बढी समयसम्म एनालग प्रविधी मार्फत सञ्चालन हुदै आएकाे केबुलकार मर्मत संभार लगत्तै आज बिहानैदेखी डिजिटल डी– कनेक्ट प्रविधी मार्फत सञ्चालनमा आएको मनकामना दर्शन प्रालिका प्रबन्ध निर्देशक राजेशबावु श्रेष्ठले बताए ।
केबलकार एनागलबाट डिजिटल डी– कनेक्ट प्रणाली मार्फत सञ्चालन ल्याउन गएकाे असार ३१ गतेदेखी पूर्ण रुपमा बन्द गरेर मर्मत संभार गरीएकाे उनले जानकारी दिए । मर्मत कार्य सकिए लगत्तै मंगलबार बिहानैदेखी पुन: सञ्चालनमा आएको हो ।
केबुलकार नियमीत रुपमा सञ्चालनमा आए लगत्तै देशैभरका श्रद्दालु भक्तजनहरु मनकामना दर्शन गर्न जान लाम लागेर बसेकाे स्टेशन म्यानेजर उज्जवल शेरचनले बताए । उनका अनुसार बिहान केबुलकार खुलेदेखी मानिसहरुकाे भिड लागेकाे छ ।
‘हामीले हाम्रा यात्रुहरुको सुरक्षाका लागि अत्याधुनिक प्रविधिमा स्तारोन्नति गर्न २ महिनादेखी केबुलकार बन्द गरेर काम गरेका थियौ’ उनले भने ‘एनालग अपरेटिङ सिस्टमबाट डिजिटल डी– कनेक्टमा रुपान्तरण गर्ने काम सम्पन्न भएको छ ।’
केबुलकारलाई डि–कनेक्ट प्रणालीमा लान अस्ट्रियाका विश्वविख्यात केबुलकार निर्माता कम्पनी डोपलमेयरका इन्जिनियर तथा प्राविधिकहरुको प्रत्यक्ष सहभागिता र सुपरिवेक्षणमा स्तरोन्नतिका काम सम्पन्न भएको थियाे ।
केबुलकारको मुख्य लठ्ठा र डिजिटल डी–कनेक्ट प्रणालीमा जादा मनकामना दर्शन प्रालिले करिब ५० करोड खर्च गरेको निर्देशक श्रेष्ठले जानकारी दिए ।
२०५५ साल मंसिर ८ गतेदेखी विधिवत रुपमा सञ्चालनमा आएको केबुलकारले चितवनको चेरेशमा बटम स्टेशन र गोरखाको मनकामना मन्दिर छेवैमा टप स्टेशन राखी मनकामना मन्दिर आउजाउ गर्नेहरुका लागि सेवा प्रदान गर्दै आएको छ ।
