गोरखा । उत्तरी गोरखाको मनास्लु पदमार्गमा पर्ने लार्केपास क्षेत्रमा ‘मार्किङ पोल’ थप गरिएको छ । उक्त क्षेत्रमा जाने स्वदेशी तथा बिदेशी पर्यटकलाई बाटो पहिल्याउन सहज होस भन्ने उद्वेश्यका साथ पोल थप गरिएको मनास्लु संरक्षण क्षेत्र आयोजनाका संरक्षण अधिकृत एवं सूचना अधिकारी भुवनराज ओझाले बताए ।
मार्किङ पाेल बाेकेर गन्तब्य तर्फ जादै मजदुरहरु
‘बिगतमा पनि उक्त क्षेत्रमा मार्किङ पोलहरु थिए । त्यस मध्ये केही हिउँका कारण केही हावाहुरीले हराए । पोल हराउदा पर्यटकलाई पदमार्ग पहिचानमा समस्या हुने गरेको थियो’ उनले भने ‘ पर्यटकलाइ पदमार्गमा समस्या नहोस भनेर गोरखाको लार्के बजारदेखी मनाङको भिमथाङसम्म पोल राखिएको हो ।’
यस अघि संरक्षण क्षेत्रले उक्त पदमार्गमा १०० वटा पोल राखेकोमा १३ वटा पोल हराएको थियो । बाँकी रहेको ८७ पोल मध्ये पनि अधिकांश पोल ढलेको, पहिरोले बगाएको अवस्थामा फेला पारी मर्मत पछी पुनः सोही स्थानमा राखिएको सूचना अधिकारी ओझाले जानकारी दिए ।
उनका अनुसार पछिल्लो पटक पुनः नयाँ २१ पोल थप गरिएको छ । थपिएको पोलले अहिले मनाङको भिमथाङसम्म पुगेको छ ।
मार्किङ पाेल राखिएका केही स्थानहरु
‘थप गरिएको र मर्मत गरेर राखिएका पोलमा उचाई मापन प्लेट पनि राखिएको छ’ सूचना अधिकारी ओझाले भने ‘अहिले प्रत्येक १०० मिटरको उचाईको फरकमा त्यस्ता प्लेट राखिएकोले पर्यटकलाई सहजता भएको छ ।’
विगतमा भने उचाई मापन प्लेट नहुदा कती उचाईमा पुगियो भनेर जिपीएस हेनुपर्ने वा जानकारी नहुने अवस्था थियो । तर अब त्यो अवस्था रहेन । पर्यटकले आफु कुन उचाईमा छु भनेर पोलबाटै जानकारी पाउने उनले जानकारी दिए ।
मार्किङ पाेल राखिएका केही स्थानहरु
संरक्षण क्षेत्रले ४ हजार मिटरबाट मार्किङ पोल राखेको छ । लार्केपास यसको उच्च बिन्दु हो । यहाँ पुग्दा पर्यटकले ५ हजार १०६ मिटर उचाई पार गर्दछन् । पासबाट मनाङको भिमथाङ भने ३ हजार ७०० मा रहेको छ । भिमथाङ एक्यापको क्षेत्र हो ।
सूचना अधिकारी ओझाका अनुसार लार्के बजारदेखी लार्केपाससम्म ६५ वटा र पासदेखी भिमथाङ बजारसम्म ४३ वटा पोल राखिएको छ ।