गोरखा । गोरखा जिल्लामा पछिल्लो समय साना उद्योगहरु बन्द हुन थालेका छन् । कोरोना महामारी पछि लगानी गर्न नसकेका तथा लगानी गरेर पनि फाइदा नभएपछी धमाधम साना उद्योगहरु बन्दहुन थालेको हो ।
साउन महिनादेखी फागुन मसान्त सम्म मात्रै जिल्ला भित्रका उद्योग ताथ बाणिज्य तर्फका ११३ वटा उद्योग बन्द भएको पर्यटन तथा उद्योग कार्यालय गोरखाका प्रमुख सुर्य भूजेलले जानकारी दिए । अधिकाशं मानिस बैदेशिक रोजगारी जाने तथा ब्यापार धाटा र पूजी चलायमान नहुदा पनि साना उद्योगहरु बन्द भएको कार्यालय प्रमुख भूजेलले बताए ।
‘अधिकाशं युवाहरु स्वदेशमा काम भएन भनेर बिदेशीन थाले’ उनले भने ‘युवाहरु बिदेशीदा यहाँ काम गर्ने मानिसका अभाव भयो र उद्योगहरु बन्द हुन थाले ।’ कार्यालय प्रमुख भूजेलले साना उद्योगहरु बन्द हुनुमा अरु पनि कारणहरु भएको बताए । उनले ‘आन्तरिक बसाई सराई पनि प्रमुख कारण भएको’ भन्दै ‘विशेषत कोरोना पछीको समयमा ब्यापार धाटाका साथै पूजी चलाएमान हुन नसक्दा उद्योगहरु बन्द भएको’ बताए ।
कोरोनाले थलिएको अर्थ ब्यवस्थामा न बैंकले न त पैसा भएका ब्यत्तीले कोही कसैले पनि ऋण दिन बन्द गरेका कारण पनि ब्यापार ब्यवसाय तथा उद्योगीहरु पलायन भएको र बन्द भएको पर्यटन तथा उद्योग कार्यालय गोरखाका प्रमुख भूजेलले अनुभव सुनाए । ‘एका तिर दोहोरो कर प्रणाणी अनि अर्को तिर ब्यापार ब्यवसाय गर्न कोही कसैले पनि ऋण नपत्याए पछी बन्द गर्नुको अर्को बिकल्प छैन’ प्रमुख भूजेलले भने ‘स्थानिय निकायमा पनि दर्ता गर र कर तिर अनि हामीकहाँ पनि दर्ता गर र कर तिर । जनताले यसलाई पनि झन्झटीलो सम्झीयो र बन्द गर्न थाले ।’
बन्द भएका ११३ साना उद्योग मध्ये बाणिज्य तर्फका ७३ र उद्योग तर्फ पर्यटन मुलक, सेवा मुलक र उत्पादन मुलक गरी ६० वटा बन्द भएका छन् ।
कार्यालयले जिल्ला भित्रै १५ करोडसम्मका उद्योगहरुलाई दर्ता गर्ने गर्दछ । जिल्ला भित्र फागुन मसान्तसम्म कुल ७ हजार २०० वटा सना उद्योग दर्ता भएको र त्यस मध्ये ५ हजार ८९३ वटा बाणिज्य तर्फको रहेको पनि कार्यालयका सूचना अधिकारी सम्सुदिन मियाँले जानकारी दिए ।