गोरखा । आफैले पढाएका बिद्यार्थीलाई बलात्कार गरेको आरोपमा पक्राउ परेका शिक्षकलाई पुर्पक्षका लागि गोरखा कारागार चलान गरिएको छ । बलात्कार आरोपमा चितवन भरतपुर महानगरपालिका–१८ घर भई काठमाडौं महानगरपालिका–४ बालुवाटार बस्ने ३२ बर्षका प्रदिप लामा लोप्चनलाई अदालतले कारागार चलान गरेको हो ।
राजधानीमा आफ्नै भिनाजुले सञ्चालन गरेको बिद्यालयमा अध्ययनरत १२ बर्षिया नाबालिका ‘२६ परिसर’ नाम परिवर्तनलाई विभिन्न प्रलोभन देखाई मिति माघ २१ गते काठमाडौंबाट भगाई गोरखा, पालुङटार नगरपालिका–५ ठाटीपोखरीमा ल्याई फागुन १ गतेदेखी ६ गतेसम्म पटक-पटक जबरजस्ती करणी गरेको आरोपमा प्रदिप पक्राउ परेका थिए ।
घटनामा पीडितको आफन्तले जिल्ला प्रहरी परिसर, महिला बालबालिका तथा जेष्ठ नागरिक सेवा केन्द्र कालीमाटी काठमाडौंमा उजुरी दिएपछी फागुन १२ गते राजधानीबाट पक्राउ परेका थिए ।
फागुन १४ गते गोरखा ल्याईएका प्रदिपका विरुद्ध जबरजस्ती करणी कसूर शीर्षकमा मुद्दा दर्ता गरी अनुसन्धान पश्चात जिल्ला सरकारी वकील कार्यालय गोरखा मार्फत गोरखा जिल्ला अदालतमा पेश गर्दा अदालतले चैत्र ७ गते बुधबारपुर्पक्षको लागि कारागार चलान गरेको जिल्ला प्रहरी कार्यालय गोरखाका प्रहरी नायब उपरिक्षक एवं सुचना अधिकारी रमेशकुमार श्रेष्ठले जानकारी दिए ।
