गोरखा । गोरखा सदमुकामबाट चोरी भएको मोटरसाइकल साता दिनमा गोरखा प्रहरी उत्तरी गोरखाबाट बरामद गर्न सफल भएको छ । मोटरसाइकल संगै चोरीमा संलग्न भएको आरोपमा आरुघाट गाउँपालिका–३ थुमी, भलाकका बर्ष २७ को सुपारे भन्ने उज्जल बरामलाई पनि प्रहरी ले पक्राउ गरेको छ ।
गोरखा नगरपालिका–६ पाटेचौरबाट फागुन २६ गते शनिबार घर अगाडी पार्किङ गरेर राखेको २२० सिसीको बा. ९५ प ९२३ नम्बरको रातो कालो रंगको पल्सर बाईक सहित बरामलाई प्रहरीले चैत्र १ गते बिहीबार घरैबाट पक्राउ गरेको जिल्ला प्रहरी कार्यालय गोरखाका प्रहरी नायब उपरिक्षक एवं सूचना अधिकारी रमेशकुमार श्रेष्ठले जानकारी दिए ।
उनका अनुसार योजनाबद्ध ढंगले गोरखा र धादिङ जिल्लाको विभिन्न स्थानबाट विभिन्न मितिमा चोरी गरेको मोटरसाईकलहरु बरामद गरी मोटरसाईकल चोरीमा संलग्न रहेका ११ जनालाई पक्राउ गरी निजहरु विरुद्ध चोरी शीर्षकमा मुद्दा दर्ता गरी कार्यालयबाट अनुसन्धान भई रहेकोमा थप अनुसन्धानको क्रममा मोटरसाइकल धनी आसिफ आली मियाले पल्सर मोटरसाईकल चोरी भएको घटनामा बराम पक्राउ परेको हो ।
पक्राउ परेका बरामलाई चैत्र २ गते शुक्रबार चोरी कसूर शीर्षकमा मुद्दा दर्ता गरी गोरखा जिल्ला अदालतबाट म्याद थप गरी प्रहरीको हिरासतमा राखी अनुसन्धान थालिएको सूचना अधिकारी श्रेष्ठले जानकारी दिए ।
गोरखामा साउन यता १६ वटा मोटरसाइकल चोरी भएको मुद्वा प्रहरीमा दर्ता भएको र यो सहित ५ थान मोटरसाइकल फेला परेको छ । गोरखा प्रहरीले मोटरसाइकल चोरी हुन बाट सवारी धनीले सुरक्षित स्थानमा पार्किङ गर्न वा मोटरसाइकलमा ह्विल लक वा चेन लक गर्न समेत अनुरोध गरेको छ ।