तस्बिर क्यान नेपाल
काठमाडौं । क्यानडासँगको दोस्रो एकदिवसीय क्रिकेट पनि नेपालले जितेको छ । त्रिवि क्रिकेट मैदान कीर्तिपुरमा क्यानडाले दिएको २८६ रनको लक्ष्य नेपालले ४५ ओभर १ बलमा ६ विकेट गुमाएर जित हातपारेको हो ।
नेपालको जितमा कीर्तिमानसहित ३ जना खेलाडीले अर्धशतक प्रहार गरेको छ । आजको खेलमा अनिल शाहले एकदिवसीय क्रिकेटमा नेपालका लागि सबैभन्दा छिटो अर्धशतक बनाउन सफल भए ।
अनिलले १९ बलमै ५० रन बनाए । उनले ७ चौका र ३ छक्का प्रहार गरे । २० बल खेल्दा भने उनी आउट भए । यसअघि आसिफ शेखले गएको वर्ष पपुवा न्युगिनीसँगको खेलमा २१ बलमा अर्धशतक बनाउँदै रेकर्ड बनाएका थिए । त्यो रेकर्ड आज अनिलले तोडेका हुन् ।
यस्तै, कप्तान रोहित पौडेलले ८७ र देव खनालले ७६ रन बनाए । यस्तै, भीम सार्कीले २३, पवन सर्राफले १४ र आशिफ शेखले १० रन बनाए । सोमपाल कामी र कुशल मल्ला समान ९–९ रनमा नटआउट रहे । आजको जितसँगै ३ खेलको शृङ्खला नेपालले १ खेलअघि नै जितेको छ ।
यसअघि टस जितेर पहिले ब्याटिङ गरेको क्यानडाले ५० ओभरमा ९ विकेट गुमाएर २८५ रन बनाएको थियो । उसका आरोन जोनसनले सर्वाधिक ६५ र नवनित धलिवालले ४६ रन बनाए ।
बलिङतर्फ नेपालका रोहित पौडेल र कुशल मल्लले समान २–२ तथा सोमपाल कामी, सूर्य तामाङ, पवन सर्राफ र आकाश चन्दले समान १–१ विकेट लिएका थिए ।