कैलाली । जानकी गाउँपालिका–९ मा रहेको अमरावती सामुदायिक वनमा पाटे बाघ मृत अवस्थामा फेला परेको छ ।
तारले बेरिएको अवस्थामा वयस्क पोथी पाटे बाघ मृत अवस्थामा भेटिएको सव डिभिजन बन कार्यालय लम्कीका फरेष्टर रामबहादुर रावलले जानकारी दिए । उनका अनुसार बाघको शरीरबाट दुर्घन्ध फैलिसकेकाले केही दिन अगाडि नै मरिसकेको हुनसक्ने देखिएको छ ।
स्याउला लिन जङ्गल पुगेका स्थानीयले मृत बाघ देखेपछि प्रहरीलाई खबर गरेका थिए । त्यसपछि डिभिजन बन कार्यालय लम्की, प्रहरी र स्थानीय सो स्थलमा पुगेका थिए ।
मृत बाघको मुचुल्का बनाइ डिभिजन बन कार्यालय पहलमानपुर ल्याइएको सव डिभिजन बन कार्यालय लम्कीका प्रमुख शेरबहादुर भण्डारीले जानकारी दिए । उनका अनुसार आवश्यक कानूनी प्रकृया पुरा गरेर बाघको शव खाडलमा पुरीको छ ।
