काठमाडौं । आईसीसी १९ वर्ष मुनिको विश्वकप क्रिकेटमा आयोजक दक्षिण अफ्रिकाले विजयी शुरुवात गरेको छ । समूह ‘बी’ मा दक्षिण अफ्रिकाले वेस्ट इन्डिजलाई ३१ रनले हराएको हो ।
जितका लागि २८६ रनको लक्ष्य पछ्याएको वेस्ट इन्डिज ४० ओभर १ बलमा २५४ रनमा अलआउट भयो । उसका जेवेल एन्ड्रियुलले शतकीय पारी खेले पनि टोलीलाई जिताउन सकेनन् ।
दक्षिण अफ्रिकाका क्वेना माफाकाले ५ विकेट लिए । त्यसअघि पहिला ब्याटिङ गरेको दक्षिण अफ्रिकाले निर्धारित ५० ओभरमा ९ विकेट गुमाएर २८५ रन बनाएको थियो । उसका डेवन मारिसले ६५ रन बनाए । वेस्ट इन्डिजका नाथन सेलीले ३ तथा नाथन इडवार्ड र डेशावन जेम्सले समान २–२ विकेट लिए ।
शुक्रबार भएको अर्को खेलमा आयरल्यान्डले अमेरिकालाई ७ विकेटले हरायो । अमेरिकाले दिएको १०६ रनको सामान्य लक्ष्य आयरल्यान्डले २२ ओभर ५ बलमा ३ विकेट गुमाएर भेटायो ।
टस हारेर पहिला ब्याटिङ गरेको अमेरिका ४० ओभर २ बलमा १०५ रनमा अलआउट भएको थियो । आज स्कटल्यान्ड र इंग्ल्यान्ड, पाकिस्तान र अफगानिस्तान तथा बंगलादेश र भारतबीच खेल हुनेछ । नेपालले आफ्नो पहिलो खेल भोलि न्युजिल्यान्डसँग खेल्नेछ ।