गोरखा । सदरमुकामको विभिन्न पसल फोरेर सामान चोरी गरेको आरोपमा प्रहरीले सदरमुकामबाट १ जना युवकलाई पक्राउ गरेको छ । पक्राउ पर्नेमा गोरखा नगरपालिका–५ पदेलथोक निवासी २८ बर्षका भरत राना भएको जिल्ला प्रहरी कार्यालय गोरखाका प्रहरी नायब उपरिक्षक एवं सूचना अधिकारी रमेशकुमार श्रेष्ठले जानकारी दिए ।
उनका अनुसार पौष २४ गते बिहान ३ः०० बजेको समयमा गोरखा नगरपालिका–५ पदेलथोक स्थित गोरखा दरबार जाने बाटोमा कविता रानाले सञ्चालन गरेको शुभलक्ष्मी खाजा तथा नास्ता पसलबाट चुईगम, चोकोपाई चकलेट, चाउचाउ, लेज, कुर्कुरे, रेडबुल, स्टिलको कप, बिस्कुट लगायतका सर–सामानहरु चोरी गरेका थिए । उक्त पसलबाट १५ हजार ११० रुपैयाँ बरावरको सामाग्री चोरी गरेका थिए ।
सोही दिन बिहान ४ः०० बजेको समयमा गोरखा नगरपालिका–५ को पदेलथोक स्थित गोरखा दरबार जाने बाटोमा कृष्ण सिर्मलले सञ्चालन गरेको गोरखकाली डिजिटल फोटो स्टुडियोबाट प्रिन्टर १ थान सहित करिब ४० हजारबराबरको धनमाल चोरी गरेको सूचना अधिकारी श्रेष्ठले जानकारी दिए ।
पक्राउ परेको भरत गोरखा नगरपालिका–८ आहाले भुषाल गाउँ घर भई हाल पदेलथोक बस्ने गरेको पनि प्रहरीलेृ जानकारी दिएको छ । चोरी भएका क्षेत्रका मानिसहरुको ब्यापक गुनासो पछि प्रहरीले गरेको अनुसन्धानमा भरत राना संलग्न देखिए पछि उनलाई पौष २९ गते पक्राउ गरेको सूचना अधिकारी श्रेष्ठले जानकारी दिए ।
पक्राउ परेका रानालाई माघ २ गते चोरी कसूर शीर्षकमा मुद्दा दर्ता गरी गोरखा जिल्ला अदालतबाट अनुसन्धानका लागि म्याद थप गरिएको छ । उनलाई अहिले प्रहरीको हिरासतमा राखी अनुसन्धान सुरु गरिएको पनि प्रहरीले जानकारी दिएको छ ।
