चितवन । माडी नगरपालिकाले कृत्रिम गर्भाधानबाट सुत्केरी भएका पशुचौपायालाई सुत्केरी भत्ताबापत दिन थालेको छ । नगरभित्र रहेका गाईभैंसीमा कृत्रिम गर्भाधान गराई सुत्केरी भएका पशुलाई आहाराका लागि १ हजारका दरलले भत्ता दिने थालेको हो ।
नगरपालिकाका पशुपन्छी तथा मत्स्य विकास शाखाप्रमुख डा.रबिन बस्ताकोटीका अनुसार सुरुआतमा सुत्केरी भएका गाईभैँसीलाई भत्ता दिन थालिए पनि अहिले कृत्रिम गर्भाधान गराएका र बीमा गरिएकालाई भत्ता उपलब्ध गराइएको हो ।
माडी क्षेत्रमा भैंसी धेरै पालिने गरे पनि कृत्रिम गर्भाधान खासै गरिँदैनथ्यो । भत्ता लिनका लागि कृत्रिम गर्भाधान गराएको प्रमाणपत्र, सो वस्तुबाट जन्मिएको पाडापाडी, बाच्छाबाच्छीसँगै भएको फोटो, पशु बीमा गराएको प्रमाणपत्रसमेत राखेर निवेदन दिनुपर्ने हुन्छ । बीमा अनिवार्य गरेपछि यस वर्ष १०० पशुधनीले भत्ता माग गर्ने अनुमान गरिएको छ ।
पशुलाई सुत्केरी भत्ताको कार्यक्रम सुरु गरेपछि अहिले पशु बीमा गराउनेको सङ्ख्यासमेत बढ्दै गएको उनले बताए । पशु बीमाका लागि सङ्घीय सरकारले ८० प्रतिशत, माडी नगरपालिकाले १५ प्रतिशत र पशुधनीले ५ प्रतिशत बेहोर्ने गरी काम गरिँदै आइएको छ ।
बस्यालका अनुसार पशु बीमामा मात्रै बार्षिक १२ लाख विनियोजन हुँदै आएको छ । माडीमा चालु आर्थिक वर्षमा ६५३ गाईभैँसीलाई कृत्रिम गर्भाधान गराइएकामा ६०० गाई र ५३ भैँसी छन् ।