गोरखा । युवाहरुको एक समूहले गोरखामा पहिलो पटक नमूना पेट्रोल पम्प सञ्चालनमा ल्याउन लागेका छन् । युवाहरुको उक्त समूहले गोरखा नगरपालिका–११ को कोरियन डाँडामा पम्प सञ्चालनको तयारी गरेको हो ।
पप्प सञ्चालनको सबै पूर्वाधार पुरा भएको सञ्चालक मध्येका एक अच्यूतलाल श्रेष्ठले जानकारी दिए । उनका अनुसार अब नेपाल आयल निगमको अन्तिम स्विकृती पाउन मात्र बाँकी रहेको छ । स्विकृती पाएको हप्ता दिनभित्रैबाट पम्प सञ्चालनमा आउने उनले बताए ।
११ रोपनी क्षेत्रफलमा फैलिएको पम्पमा युवाहरुको समूहले करिब ७ करोड रुपैयाँ लगानी गरेको अर्का सञ्चालक शरदबावु कट्टेलले जानकारी दिए । उनका अनुसार पम्पमा एटिएम मेशिन, सुविधा सम्पन्न रेष्टुरेन्टका साथै पार्किङ, कफी सप र गाडी मर्मत केन्द्र समेत राखिएको छ ।
विदेश पलायन हुने युवाहरुलाई देश र आफ्नै स्थानमा पनि लगानी गरेर ब्यवसाय गर्न सकिने उदारण बनेका ५ जना युवाहरुले पम्पमा लगानी गरेका छन् । पेशाले ब्यापारी, ठेकेदार, अडिटर, ईन्जिनियर र डिलर ब्यवसायीले पम्पमा लगानी गरेको अर्का सञ्चालक काजीराम श्रेष्ठले जानकारी दिए ।
गोरखा बजार र कुन्दुरटारमा यस अघि नै पम्प सञ्चालनमा आएको भएता पनि ति दुवै पम्प परम्परागत शैलीमा सञ्चालन हुदै आएको छ । निगमले अहिले देशैभर सुविधा सम्पन्न नमूना पप्प सञ्चालनको लागी पहल गरे अनुसार नै युवा ब्यवसायीहरुले पप्प सञ्चालनमा तयारी पुरा गरेको हो ।
गोरखाकाली फ्यूल सेन्टर प्रालिको नाममा दर्ता भएको फर्ममा ठेकेदार अच्यूतलाल श्रेष्ठ, अडिटर शरदबावु कट्टेल, डिलर रामहरी केसी, ईन्जिनियर भोला मरहट्टा र ब्यापारी काजीराम श्रेष्ठ आबद्व छन् ।
पप्पको तेल भण्डार क्षमता ६० हजार लिटरको रहेको छ । जसमा डिजल ४८ हजार र पेट्रोल १२ हजार लिटर क्षमताको भएको प्रालिले जानकारी दिएको छ ।