गोरखा । गोरखा नगरपालिका–७, काँडाघारी स्थित धारापानी एक किसानले ९ किलोको एउटै काउली फलाएकी छिन् । स्थानीय किसान एककुमारी बस्नेतले एउटै काउलीको थुङ्गा ९ किलोको फलाउन सफल भएकी हुन् । अहिले बस्नेतले उत्पादन गरेको काउली ‘कृषि, पर्यटन तथा ब्यापार प्रबद्र्वन मेला–२०८०’ को प्रर्दशनीमा राखिएको छ ।
‘‘काउली जोख्दा पुरै ११ किलोको थियो, कृषि ज्ञानकेन्द्र गोरखाका प्रमुख निलकण्ठ पोखरेलले भने, ‘‘डाँठ र पात गरी २ केजी घटाएर हिसाव गर्दा थुङ्गा मात्र ९ किलो भन्दा बढीको रहेको छ ।’’ प्रर्दशनीका लागि किसानले बोकेर ल्याउदा डाँठ र पातको सहित ११ किलो भएपनि डाँठ र पाताको तौल घटाएर हिसाव गर्दा ९ किलोको अनुमान गरी प्रर्दशनीमा राखिएको उनले बताए ।
प्रमुख पोखरेलका अनुसार यो नेपालमा अहिलेसम्मकै सवैभन्दा ठूलो उत्पादन भएको काउली हाे । यसअघि बागलुङ नगरपालिका–९ तित्याङ थापाथरका पदम खत्रीको खत्री एग्रो फार्ममा ८ किलो ८८० ग्रामको काउली फलाएका थिए ।
करिब १ रोपनी क्षेत्रफलमा नियमित काउलीको व्यवसायिक खेती गर्दै आएका किसान बस्नेतको बारीमा अनुमानित ८ किलोग्राम भन्दा बढीका थुप्रै काउली उत्पादन भएको देख्न सकिन्छ । बारीमा उत्पादित काउली ठुलो भएका कारण बजारमा बिक्री गर्न समेत कठिनाई हुने गरेकाले ठुला काउली छिमेकमा नै बाडीचुँडी खाने गरेको उनले बताइन् ।
गाेरखा सदरमुकामकी किसान एककुमारीले आफ्नाे बारीमा फलाएकाे ९ किलाेकाे एउटै काउली
“बारीमा अहिले पनि ८ किलोभन्दा ठूला काउली धेरै नै फलेका छन्, बारीको सबैभन्दा ठूलो काउली टिपेर जोख्ने क्रममा ११ केजीको भएको पाइयो”, बस्नेतले भनिन, “लामो समयको मेहनत र परिश्रमका कारण राम्रो उत्पादन भएकोमा खुशी लागेको छ ।” काउलीको डाँठ र पात कटाएर ९ किलो भनिएको भएता पनि अझै बढी तौल भएको उनको भनाई छ ।
कृषि क्षेत्रको निरन्तर मेहनत गर्दै आउनु भएकी किसान बस्नेतले मौसमी तथा बेमौसमी तरकारी खेतीमा गर्ने क्रममा यस पटक एउटै काउली ९ केजी भन्दाबढीको उत्पादन भएको जानकारी दिइन् ।
कृषि ज्ञानकेन्द्र गोरखाले किसान बस्नेतको परिवारलाई बारीमा ठूलाठूला काउली फलेकाले ‘कृषि, पर्यटन तथा ब्यापार प्रबद्र्वन मेला–२०८०’ को प्रर्दशनीमा सुझाव दिएकाले आफुहरुले बारीमा उत्पादित सवैभन्दा ठूलो काउली प्रर्दशनीमा पुर्याएको एककुमारीकी श्रीमान प्रलाद बस्नेतले बताए ।
मेलामा प्रर्दशनमा राखिएकाे काउली देखाउदै कृषि ज्ञान केन्द्र गाेरखाका कर्मचारी
‘‘भक्तपुरे जातको काउलीलाई यो बर्ष हामी आफैले क्रस गरेर बिउ उत्पादन गरी लगाएका हौ, उनले भने, भदौमा रोपेको काउली अहिले टिपेर पुरै जोख्दा ११ केजी रहेको पाइयो, । मेलामा ज्ञान केन्द्रले प्रर्दशनमा राखेको उक्त काउली हेर्नेका अहिले भिड नै लागेको छ ।
