काठमाडौं । प्रधानमन्त्री कप महिला टी–२० राष्ट्रिय प्रतियोगिताको उपाधि सशस्त्र प्रहरी बलको एपीएफ क्लबले जितेको छ । एपीएफ क्लबले कोशी प्रदेशलाई फाइनल खेलमा ११ रनले पराजित गर्दै उपाधि जितेको हो ।
विजेता एपीएफ क्लबले ५ लाख तथा उपविजेता कोशीले ३ लाख पुरस्कार हात पारेको छ ।
कीर्तिपुरस्थित त्रिभुवन विश्वविद्यालयको क्रिकेट मैदानमा टस जितेर पहिलो ब्याटिङ गरेको एपीएफ क्लबले कोशी प्रदेशसामु जितका लागि ११५ रनको लक्ष्य प्रस्तुत गरेको थियो । कोशीले २० ओभर खेल्दै ४ विकेटको क्षतिमा १०३ रन मात्र बनाउन सफल भएको थियो ।
यसअघि ब्याटिङ गर्ने क्रममा एपीएफ क्लबले ७ विकेटको क्षतिमा ११४ रन बनाएको थियो । एपीएफका लागि इन्दु बर्माले अद्र्धशतकीय पारी खेलिन् । उनले ४७ बल खेल्दै ५३ रनको योगदान दिइन् । सो क्रममा बर्माले ६ चौका र १ छक्का प्रहार गरिन् । त्यस्तै ज्योति पाण्डेले २७ तथा रोमा थापाले १४ रन बनाइन् ।
बलिङतर्फ कोशीका लागि अप्सरी बेगमले ह्याट्रिक गरिन् । उनले २०औँ ओभरको पहिलो, दोस्रो र तेस्रो बलमा लगातार विकेट लिइन् । पहिलो बलमा इन्दु बर्मा, दोस्रो बलमा नेरी थापा तथा तेस्रो बलमा सोनु खड्काको विकेट लिइन् ।
त्यस्तैगरी, एलिशा खडियाले २ तथा कप्तान रुविना क्षेत्री र निशा शाहले समान १–१ विकेट लिन सफल भएकी थिइन ।
उता कोशी प्रदेशका लागि ब्याटिङ गर्ने क्रममा कप्तान रुबिना क्षेत्रीले अद्र्धशकतीय पारी खेलिन् । उनले ६२ रन बनाइन् । क्षेत्रीले ५८ बल खेल्दै १ छक्का र ७ चौका प्रहार गरिन् । त्यस्तै काजल श्रेष्ठले २९ बलमा २२ रन बनाउन सफल भइन ।
बलिङतर्फ एपीएफ क्लबका लागि करुणा भण्डारी र कप्तान सीता रानामगरले समान १–१ विकेट लिइन् ।