काठमाडौं । मानवसेवा आश्रमको सहजीकरणमा आनी छोइङ डोल्मा फाउन्डेसनले भूकम्पपीडितलाई आज २० लाख बराबरका खाद्यान्न तथा लत्ताकपडा सहयोग गरेको छ । गत कात्तिक १७ जाजरकोट केन्द्रबिन्दु भएर गएको भूकम्पबाट घरबारविहीन भएका पीडितलाई आज फाउन्डेसनले खाद्यान्न तथा लत्ताकपडा वितरण गरेको हो ।
भूकम्प प्रभावित २५० घरधुरीलाई प्रतिपरिवार १ बोरा चामल, ५ किलो दाल, २ किलो सोयाबिन, २ किलो नुन र २ लिटर तेलसहित न्यानो ब्ल्याङ्केट वितरण गरिएको छ । त्यस्तै ४०० बालबालिकालाई न्यानो कपडासहित जुत्ता वितरण गरिएको छ ।
भौगोलिक विकटताका कारण भूकम्प गएको २ महिना बितिसक्न लाग्दासमेत जाजरकोटको ध्यार गाउँमा कुनै पनि सरकारी तथा गैरसरकारीतर्फबाट राहत प्राप्त हुन नसकेको अवस्थामा उक्त सहयोगले कष्टपूर्ण जीवन बिताइरहेका भूकम्पपीडितलाई राहत पुग्ने आनी छोइङ डोल्मा फाउन्डेसनका अध्यक्ष आनी छोइङ डोल्माले बताइन ।
गायिका तथा समाजसेवी आनी छोइङ, मानवसेवा आश्रमका केन्द्रीय अध्यक्ष रामजी अधिकारी, आश्रमका कोषाध्यक्ष होमनाथ तिमल्सिना, कर्णाली प्रदेश संयोजक सञ्जिता गौतमलगायतको टोलीले राहत वितरण गरेका हुन् ।
