काठमाडौं । अवरुद्ध बीपी राजमार्ग सञ्चालनमा आएको छ । बसमा स्थानीयले आगजनी गरेपछि अवरुद्ध बनेको राजमार्ग दिउँसो १ बजेपछि सञ्चालनमा आएको प्रहरीले जनाएको छ ।
सोमबार बिहान रामेछापको मन्थलीबाट काठमाडौं जाँदै गरेको बागमती प्रदेश ०१–००६ ख ४५९३ नं को अरनिको यातायात सेवा प्रालिको बसले काठमाडौँबाट खुर्कोट जाँदै गरेको बा ६० प ३५४५ नं को मोटरसाइकललाई ठक्कर दिँदा मोटरसाइकलमा सवार खोटाङको दिक्तेल नगरपालिका– १० रुपाकोटकी १८ वर्षीया मुनाकला राईको घटनस्थलमै ज्यान गएको थियो ।
यस्तै, दुर्घटनामा परी मोटरसाइकल चालक खोटाङ जिल्ला तुवाचुङ नगरपालिका–२ का कुमार राईको पनि उपचारका लागि स्थानीय खाल्टे अस्पतालमा लैजाँदै गर्दा बाटोमै ज्यान गएको थियो ।
