काठमाडौं । श्रीलंकाले लागुऔषध तस्करीविरुद्ध सुरु गरेको अपरेशनमा १५ हजार जनालाई पक्राउ गरेको छ । यस अवधिमा करिब ४४० केजी लागुऔषध बरामद भएको छ । जसमध्ये ठुलाे मात्रामा गाँजा र हेरोइन समावेश छ ।
श्रीलंका प्रहरीका अनुसार पक्राउ परेकामध्ये १३ हजार ६६६ ओसारपसारमा संलग्न रहेका छन् भने करिब १ हजार १०० लागुऔषध दुव्र्यसनी छन् ।
लागुऔषधको लतबाट छुटकारा दिलाउन उनीहरुलाई सैन्य सुधारकेन्द्रमा पठाइएको छ । श्रीलंकामा लागुऔषध तस्करहरूलाई नियन्त्रण गर्न यो महिना युक्तिया नामक विशेष अभियान सुरु गरिएको थियो ।
क्रिसमसलाई ध्यानमा राखेर केही दिनका लागि छापा मार्ने काम रोकिएकाे प्रहरीले जनाएको छ । तर, मानवअधिकारकर्मी हेजाज हिजबुल्लाहले यो कारबाहीको विरोध गरेको छ ।
प्रहरीले बिना सर्च वारेन्ट छापा मारेको उनीहरुको आरोप छ । श्रीलंकाली नौसेनाले यसअघि डिसेम्बर २०२२ र अप्रिल २०२३ मा २ वटा अपरेशनहरू सञ्चालन गरेको थियो ।
श्रीलंकामा अहिलेसम्मकै सबैभन्दा ठूलो लागुऔषधको अप्रेसन सन् २०१६ मा गरिएको थियो । त्यतिबेला प्रहरीले करिब ८०० केजी कोकिन बरामद गरेको थियो ।
अहिले सुरु भएको अभियान प्रति सामाजिक सञ्जालमा अभियन्ता अम्बिका सतकुनाथनले प्रमाणका आधारमा खोजी अभियान नभएर गरिब क्षेत्रलाई मात्रै लक्षित गरिएको बताएका छन् ।
प्रहरीले साना कारोबारी र लागुऔषध प्रयोगकर्तालाई पक्रन थाले पनि ठूला तस्करसम्म पुग्न नसेका उनको भनाई छ ।
