गोरखा । सदरमुकाममा जारी गोरखा जिल्ला स्तरीय ११औं राष्ट्रपति रनिङशिल्ड प्रतियोगिताको उपाधी सिरानचोक गाउँपालिकाले हात पारेको छ ।
सदरमुकाम स्थित खेलकुद मैदानमा आइतबार राती सम्पन्न भएको प्रतियोगितामा ९ स्वर्ण, ५ रजत र २ कास्य पदक गरी कुल १६ पदक सहित सिरानचोक गाँउपालिकाले उपाधी उचालेको हो ।
सिरानचोक यो तेस्रो जित भएको जिल्ला खेलकुद बिकास समितिले जानकारी दिएको छ । यस अघि भएको आठौ र दशौं जिल्ला स्तरीय राष्ट्रपती रनिङ शिल्ड प्रतियोगितामा पहिलो भएको थियो ।
प्रतियोगितामा पालुङटार नगरपालिका दोस्रो हुन सफल भएको छ । उसले ८ स्वर्ण, ३ रजत र ४ कास्य गरी कुल १५ पदक सहित हात पारेको छ ।
त्यस्तैगरी, बारपाक सुलिकोट गाउँपालिकाले ४ स्वर्ण, ३ रजत र ४ कास्य गरी कुल ११ पदक सहित तेस्रा हुन सफल भएको जिल्ला खेलकुद विकास समिति गोरखाका अध्यक्ष शान्तसिं बस्नेतले जानकारी दिए ।
अध्यक्ष बस्नेतका अनुसार आरुघाट गाउँपालिकाले प्रतियोगितामा २ स्वर्ण, ८ रजत र ३ कास्य गरी १३ पदक जित्न सफल भएको छ ।
उता गण्डकी गाउँपालिकाले २ स्वर्ण, ७ रजत र ३ कास्य गरी कुल १२ पदक जितेको छ भने अजिरकोट गाउँपालिकाले २ स्वर्ण, २ रजत र ४ कास्य गरी कुल ८, गोरखा नगरपालिका गोरखाले २ स्वर्ण र ३ कास्यगरी कुल ५, भीमसेन थापा गाउँपालिकाले १ स्वर्ण, २ रजत र २ कास्य गरी कुल ५ वटा पदक जित्न सफल भएको छ ।
खेलमा सहभागी शहीद लखन गाउँपालिकाले ३ कास्य पदक, धार्चे गाउँपालिका र चुमनुब्री गाउँपालिको १÷१ कास्य पदकमा चित्त बुझाउन बुझाउनु परेको छ ।
चुमनुब्री गाउँपालिका भने पहिलो पटक राष्ट्रपति रनिङशिल्ड प्रतियोगितामा सहभागी भएको हो ।
प्रतियोगितामा बिजेता खेलाडीहरुलाई आइतबार राती नै एक कार्यक्रमका बिच मेडल, प्रमाणपत्र तथा पुरस्कार प्रदान गरिएको थियो । प्रतियोगिता शुक्रबारदेखि सञ्चालनमा आएको थियो ।
