गोरखा । उत्तरी गोरखाको चुमनुब्री गाँउपालिकाका प्रमुख निमा लामालाई पोखरामा सम्मान गरिएको छ । अध्यक्ष लामालाई आठौं पर्वतिय महोत्सवको अवसरमा अर्थमन्त्री डा.प्रकाश शरण महतले सम्मान गरेको हो ।
पालिकाका अध्यक्ष लामालाई चुम उपत्यकामा विगत १०० बर्ष देखि विद्यमान अहिंसा (श्याग्या) परम्पराको संरक्षण र विकासमा उनको संलग्नता र श्याग्या परम्परा मार्फत मनासलु संरक्षण क्षेत्रको जैविक विविधता संरक्षण र जलवायु परिवर्तन असरको न्युनिकरणमा सहयोग पुर्याएको भन्दै ताम्र पत्रले सम्मान गरिएको थियो ।
नेपाल पर्वतारोहण संघले आयोजना गरेको महोत्सवमा लामालाई पर्यटन प्रवर्धन मार्फत स्थानिय जनसमुदायको जिविकोपार्जनमा उल्लेखनीय योगदान पुर्याएको भन्दै अर्थमन्त्री डा.महतले प्रशंसा समेत गरेका थिए ।
संघले आफ्नो योगदानलाई कदर गर्दै सम्मान गरेकोमा लामाले खुशी ब्यक्त गर्दै आयोजक प्रति कृतज्ञ भएको बताए । उनले यो सम्मानले आफुलार्य अझै उक्त काम प्रति लागिरहन प्रोत्साहित गरेको समेत बताए ।