विराटनगर । विराटनगर महानगरपालिका–७ स्थित एक कवाडी गोदाममा भएको आगलागीमा परी ज्यान गुमाउनेको संख्या ३ पुगेको छ । बुधबार भएको आगलागीमा अन्य ३ जना घाइते भएका छन् ।
आगलागीका घाइतेमध्ये सुशीला पासपानको कीर्तिपुरस्थित जलनसम्बन्धी विशिष्टिकृत अस्पतालमा उपचारका क्रममा ज्यान गएको कोशी प्रदेश प्रहरी कार्यालयले जनाएको छ ।
यसैगरी, सोही अस्पतालमा उपचारका क्रममा ६५ वर्षीया सुनीता कामतको ज्यान गएको छ । यसअघि विराटनगर–६ का ३५ वर्षीय दीपक मण्डलको विराटनगरस्थित न्युरो अस्पतालमा उपचारका क्रममा ज्यान गएको थियो ।
आगोले जलेर घाइते भएकामा ५८ वर्षीय किशोर पासवान, ३० वर्षीया पिङ्की कामत र ६० वर्षीया रिता सरदार छन् । उनीहरुको कीर्तिपुरस्थित जलन सम्बन्धी विशिष्टिकृत अस्पतालमा उपचार भइरहेको प्रहरीले जनाएको छ ।
घाइतेहरुलाई नेपाली सेनाको एयर एम्वुलेन्सद्वारा उपचारको लागि कीर्तिपुर लगिएको थियो । विराटनगर महानगरपालिकासहित विभिन्न पालिकाका गरी ६ वटा दमकल प्रयोग गरी स्थानीय र प्रहरीले आगो निभाएका थिए ।
बिजुली सर्ट भइ सुरु भएको आगलागीबाट करिब ४० लाख रुपैयाँ बराबरको क्षति भएको प्रहरीले जनाएको छ ।
