गोरखा । गएको मंसिर ७ गते बिहीबार गण्डकी गाँउपालिकाको कोलडाँडामा नाचगानको क्रममा खुकुरी प्रहार गरेर फरार भएका मन्दिप चेपाङले सोमबार गोरखा प्रहरीमा आत्मासमर्पण गरेका छन् ।
नाचगानका क्रममा एक्कासी गण्डकी गाँउपालिका–१ मकैसिङको कोलडाँडा बस्ने २४ बर्षका सागर गुरुङलाई खुकुरी प्रहार गरेर फरार भएका चेपाङ सोमबार गोरखा प्रहरीमा आएर आत्मासमर्पण गरेको जिल्ला प्रहरी कार्यालय गोरखाका प्रहरी उपरिक्षक अनुपम श्रेष्ठले जानकारी दिए ।
राती ११ बजे भएको उक्त आक्रमणमा सागर गुरुङको टाउको गंभिर चोट लागेको थियो । लगत्तै गुरुङको चितवनमा टाउकोको अप्रेशन गरिएको थियो । सागरलाई हिजो मात्र अस्पतालले डिस्चार्ज गरेर घर पठाएको छ । उनका आफन्तका अनुसार सागरलाई घरमा नै राखेर थेरापी गराइने छ । उनको बोली समेत फुटन सकेको छैन ।
यता जिल्ला प्रहरी कार्यालय गोरखा प्रहरी निरिक्षक एवं सूचना अधिकारी रबिन्द्र अधिकारीका अनुसार घटनामा संलग्न भएको आरोपमा मंसिर १० गते गण्डकी गाँउपालिका–१ मकैसिङ बुटार बस्ने २६ बर्षिया बिमला चेपाङलाई पक्राउ गरी ११ गते ज्यान मार्ने उद्योग कसूर शीर्षकमा मुद्दामा गोरखा अदालतबाट म्याद थप गरी अनुसन्धान भई रहेको जनाएको छ ।
त्यस्तैगरी, सोही घटनाका मुख्य आरोपी चेपाङलाई पनि प्रहरीले आज सोही मुद्वामा गोरखा अदालत उपस्थित गराउने र म्याद थप गराएर अनुसन्धान सुरु गर्ने पनि प्रनि अधिकारीले बताए ।
घटना लगत्तै ब्यापक रुपमा खोजी गरेको प्रहरीले उनलाई फेला पार्न नसके पछी उनको ईच्छाकामना गाँउपालिका–३ फिस्लिङ्ग चितवनमा रहेको घरबाट जापान जान भिषा लागेको पासपोर्ट र मोटरसाइकल नियन्त्रणमा लिएको थियो ।
