गोरखा । गोरखामा आज ट्याक्टर दुर्घटनामा परी १ जनाले ज्यान गुमाएको छ भने अन्य ३ जना घाइते भएका छन् ।
सहिद लखन गाउँपालिका–३, स्थित सिलिङदोभान सडकखण्डमा घ १ त १२५ नम्बरको ट्याक्टर विहान करिब १० बजे दुर्घटनामा परेको जिल्ला ट्राफिक प्रहरी कार्यालय गोरखाका प्रमुख शिवप्रसाद पाठकले जानकारी दिए ।
दुर्घटनामा परी गण्डकी गाउँपालिका–३ घर भएका २९ बर्षका पदमबहादुर थापामगरको ज्यान गएको उनले बताए । दुर्घटनामा गम्भीर घाइते भएका थापामगरलाई उपचारका लागि चितवन मेडिकल कलेजमा उपचारको क्रममा ज्यान गएको प्रमुख पाठकले जानकारी दिए ।
दुर्घटनामा सहिद लखन गाउँपालिका–३ घर भएका २६ बर्षका रामबहादुर आलेमगर, तनहुँको आँवुखैरेनी गाउँपालिका–३ बस्ने २२ बर्षका प्रदिप अर्याल र गोरखा नगरपालिका–१३ घर भएका ट्याक्टर चालक ३५ बर्षका विश्वास गुरुङ घाइते भएको जिल्ला ट्राफिक प्रहरी कार्यालयले जानकारी दिएको छ ।
घाइतेहरु सबैको चितवनमा उपचार भइरहेको छ । ज्याप्राङबाट–नाम्जुङतर्फ ढुङगा बोकेर जाँदै गरेको ट्याक्टर सडकमा पल्टिएर दुर्घटनामा परेको हो । घटनाको सम्बन्धमा थप अनुसन्धान भइरहेको जिल्ला ट्राफिक प्रहरी कार्यालय गोरखाले जनाएको छ ।
