काठमाडौं । नेपाल सुपर लिग (एनएसएल) को दोस्रो संस्करण अन्तरर्गत आज २ खेल हुने भएको छ । दिउँसो १ बजेबाट सुरु हुने पहिलो खेलमा झापा एफसी र पोखरा थन्डर्स भिड्दैछन् ।
यस्तै साँझ साढे ५:३० बजे हुने दोस्रो खेलमा धनगढी एफसी र ललितपुर सिटी एफसीबीच प्रतिस्पर्धा हुँदै छ । आज पोखराको लागि यो तेस्रो र झापाकको लागि दोस्रो खेल हुनेछ ।
२ खेलमा अपराजित रहेको पोखराले आफ्नो पहिलो खेलमा एफसी चितवनलाई १-० ले पराजित गरेको थियो । दोस्रो खेलमा ललितपुर सिटी एफसीसँग गोलरहित बराबरी खेलेको पोखरा अपराजित यात्रालाई निरन्तरता दिने योजनामा देखिन्छ ।
झापा पहिलो पटक एनएसएल खेलिरहेको नवप्रवेशी टोली हो । टोलीको मार्की तथा कप्तानमा राष्ट्रिय टिमका सर्वाधिक गोलकर्तामध्ये एक अन्जन विष्ट छन् ।
स्पानिस मुख्य प्रशिक्षक रहेको झापा पहिलो खेलमा स्पोर्टिङ इलाम एफसीसँग १-० ले पराजित भएको थियो । झापा आज पहिलो अंक र जितको लक्ष्यमा हुनेछ ।
यस्तै आजको दोस्रो खेल २ अपराजित टोली धनगढी एफसी र ललितपुर सिटी एफसीबीच हुनेछ । यो खेल साँझ ५:३० बजे दशरथ रंगशालामै हुनेछ । दुवै टोली अपराजित यात्रालाई निरन्तरता दिने लक्ष्यमा छन् ।
धनगढीले यसअघिका दुवै खेल जित्दै ६ अंक जोडेर शीर्ष स्थानमा छ । १ जित र १ बराबरी खेलेको ललितपुर ४ अंकसहित दोस्रो स्थानमा छ ।
मंसिर ८ गतेदेखि सुरु भएको प्रतियोगितामा ९ टिमको सहभागिता रहेको छ ।