पोखरा । नेपाल प्रहरी प्रशिक्षण प्रतिष्ठान, महाराजगंजमा सञ्चालन भईरहेको ४१औं आईजिपि रनिङ्ग शिल्ड फुटबल प्रतियोगिता–२०८० को उपाधि गण्डकी प्रदेश प्रहरी कार्यलयको हात पारेको छ ।
शुक्रबार भएको फाईनल खेलमा प्रहरी प्रधान कार्यालयको फुटबल टोलीलाई १–० को गोल अन्तरले पछि पार्दै गण्डकीले उपाधि हात पारेको हो ।
गण्डकीका लागि निर्णायक गोल प्रहरी सहायक निरीक्षक आशिष थारुले गरेका थिए । उनी प्रतियोगिताकै सर्वाधिक गोलकर्ता समेत घोषित भएका थिए । थारुले प्रतियोगिता भरीमा ६ गोल गरेर सर्वाधिक गोलकर्ता र फाईनल खेलको म्यान अफ दि म्याच बन्न सफल भएका थिए ।
प्रतियोगिता अवधिभरमा उत्कृष्ट प्रशिक्षक, उत्कृष्ट डिफेन्डर र उत्कृष्ट फर्वार्ड पनि गण्डकी प्रदेशकै प्रहरी नायव निरीक्षक सन्तोष सुवेदी, प्रहरी जवान शिशिर चौधरी र प्रहरी सहायक निरीक्षक विवेक गुरुङले प्राप्त गर्न सफल भएका छन् ।
समुह चरणको पहिलो खेलमा लुम्बनी प्रदेश प्रहरी कार्यलयको फुटबल टोलीलाई २–१, दोस्रो खेलमा बागमति प्रदेश प्रहरी कार्यलयको फुटबल टोलीलाई ५–० र सेमिफाईनलमा कोशी प्रदेश प्रहरी कार्यालयको टोलीलाई ४–२ को गोल अन्तरले पराजित गरेको गण्डकी प्रदेशले अपराजित यात्राको समेत उपाधि हात पारेको छ ।
यस अघि गण्डकी प्रदेश प्रहरी कार्यालयको फुटबल टोलीले २०६७ सालमा यो उपाधि हात पारेको थियो ।