गोरखा । अनलाइन भुक्तानी प्रणाली आए संगै गोरखामा विद्युत महसुल भुक्तानी गर्ने ग्राहकको संख्या ह्वात्तै बढेको छ । नेपाल विद्युत प्राधिकरण गोरखा वितरण केन्द्रमा पछिल्लो समय करिब २५ हजार ग्राहकहरुले विद्यु्तीय माध्यमबाट महसुल भुक्तानी गर्ने गरेको कार्यालय प्रमुख इन्जिनियर चिजकुमार गुरुङले जानकारी दिए ।
‘‘शाखा अन्तरर्गत अहिले ४८ हजार ८८० हजार ग्राहकहरु रहेका छन्, उनले भने, ‘‘त्यसमध्ये आधाजसो ग्राहकहरुले अनलाइन मार्फत महसुल भुक्तानी गर्न थालेका छन् ।’’ धेरै महसुल तिर्नुपर्ने ग्राहकहरुले चेक मार्फत भुक्तानी गर्ने गरेको भएपनि थोरै शुल्क तिनुपर्ने ग्राहकहरुले भने अनलाइन सेवा मार्फत महसुल बुझाउने गरेको पाइएको छ ।
जिल्लाका ३ ठाउँमा महसुलको काउण्डर रहेको भएपनि अनलाइन प्रणाली मार्फत भुक्तानी गर्ने ग्राहकको संख्या बढ्दै गएपछि काउण्टरमा चाप कम हुँदै गएको प्रमुख गुरुङको बताए । ‘‘अनलाइन प्रणाली मध्येपनि सवैभन्दा इ–सेवाबाट महसुल बुझाउने ग्राहकको संख्या धेरै छ, उनले भने,‘‘ यसले कार्यालय र ग्राहक दुवैलाई छिटो छरितो र सहज पनि भएको छ ।’’
प्राधिकरणले आफ्ना ग्राहकहरुलाई इ–सेवा, खल्ती, आइएमी पे, सबैका बैङ्क खाता लगायतका बिभिन्न अनलाइन माध्यमबाट विद्युतको महसुल तिर्नसक्ने व्यवस्था मिलाएको छ । अनलाइनको माध्यमबाट विद्युत महसुल भुक्तानी गर्दा ग्राहकहरुलाई घण्टौ लगाएर गाउँदेखि बजारसम्म आइपुग्नुपर्ने बाध्यता र समयको समेत बचत भएको प्रमुख गुरुङले बताए ।
‘‘तीस रुपैयाको महसुल बुभाउन बारपाकदेखि ५ सय रुपैया खर्च गरेर सदरमुकाम आउनुपर्ने बाध्यता ग्राहकहरुको रहेको थियो, उनले भने, ‘‘अहिले मोवाइलवाट घरमै बसेर पनि महसुल बुझाउन पाएका छन् ।’’ यसले ग्राहकहरुको खर्च समेत बचत हुने उनको भनाई छ ।
‘‘अनलाइन प्रणाली मार्फत महसुल भुक्तानीका लागि अझै पालिका वा वडावडामा पुगेर सचेतना फैलाउने योजनामा कार्यालयको छ, प्रमुख गुरुङले भने, ‘‘ग्राहकहरुलाई अनलाइन मार्फत कसरी भुक्तानी गर्ने भन्ने बारेमा जानकारी पनि छैन हामीले आफु पुगेको बेलामा ग्राहकलाई जानकारी दिनेपनि गरेका छौ ।’’
अनलाइन मार्फत विद्युत भुक्तानी गर्दा सार्वजनिक विदाका दिनमा समेत भुक्तानी गर्न सक्ने भएकाले पनि ग्राहकहरुलाई पनि सजिलो भएको उनको भनाई छ । ‘‘कार्यालयले हरेक दिन बिहान ७ बजेपछि सर्भर अपडेट गरिदिन्छ, प्रमुख गुरुङले भने, ‘‘अनलाइन मार्फत भुक्तानी हुन थालेपछि समयमा महसुल उठ्ने गरेको छ ।’’
अनलाईनबाट महसुल भुक्तानी गर्नेले बिहान ७ बजेदेखि राती १२ बजेसम्म भुक्तानी गर्न सक्ने उनले बताए । गोरखा वितरण केन्द्रमा मासिक करिब २ करोड रुपैयाँ भन्दाबढी राजस्व संकलन हुने गरेको कार्यालय प्रमुख गुरुङले जानकारी दिए ।